Ruihhlo leh Kaanite nena sumdawng thinten dan lo taka pawisa an lakluhte chu pawisa thianghlima lo chantir thintu Myanmar hmeichhia pakhat chu 2017 khan Thailand policeten an mana, 2019 January 25 ah Thailand supreme court chuan thi turin a chungthu an rel tlu ta a ni.
Thailand ram Bangkok khawpuia supreme court chuan ruihhlo dan number BE 2534 in a chungthu an ngaihtuah a, Myanmarmi Nan Myint Thei Aye hian ruihhlo zuar thinte pawisa chu pawisa thianghlimah a lo chantir mai bakah Myanmar ram chhunga ruihhlo zuartuten pawisa an rawn thawnna ber pawh amah hi a nih avangin thi tlakah court chuan a ruat a ni tih Thailand thuneitute chuan an sawi.
Nan Myint Thei Aye, kum 43 hi 2017 November thlaah Bangkok damdawiina a inelkawl laiin an man a ni. A rawn chuanna van chu Thailand ram ruihhlo dotuten an rawn dinhual thuta, a motor chhung atang an pawt chhuak ta a ni.
Pawisa thawn leh pawisa thleng hi a hnathawh a nih avangin sualna a neih loh thu leh ruihhlo zuar thintute sumpaia a inhnamhnawih lo thu chu a sawi ve tho. Nan Myint Thei Aye hian Thailand leh Myanmar ramri a awm Me Sai leh Tachilate khuaahte zahzel tur rangkachak dawrte leh hotel lamin a nei a ni tih Thai policeten an sawi. Thailand hmeichhe pakhat, sawrkar agentin ruihhlo leina tur pawisa nuai za leh sawmthum Nan Myint Thei Aye bank accountah a thun takte chu a mantuten evidence ah an hmang nghe nghe a ni.
Amah an mana an zawhfiah hnu lawkah amah nena inzawmna nei ruihhloa sumdawng thinte chu Me Sai leh Samaukparakanah an man thei ta a ni. Hengmite thil neih zawng zawngte chu Thailand thuneitute chuan an laksak vek a ni. He nu mantute zinga tel ve police lal chuan ‘hetianga man tur diktak kan man hi chu ruihhlo hmanga sum zawngtute thisen dawtpui kan tichat a ni, tin he nu hian ruihhlo atanga a hmuh Thailand pawisa nuai sangnga vel hi Myanmarah kum tin a thawn thin a ni a ti.
source ‘VOA’
