Switzerland Chuan A Ramchhungah Mahni Intihhlum Duhte Tan Na Tuar Hauh Lova Intihhlumna Bawm A Siam!
Khawvel ram tam takah chuan mahni nunna la a intihhlum chu thilsual pakhatah ngaiin tualthat anga ngai an awm. Mahni intihhlum tum a hlawhchham ta te pawh tualthah thubuai siamsak an ni a, jail tan thleng a hremna pek an ni.
Mahse, hetih lai hian khawvel ramdang ang lo takin Switzerland ramah chuan mahni intihhlum chu 1942 kum atang daih tawh khan danin a phalsak thung a ni. Kum liam ta 2020 kum pawh khan an ramchhungah mi 1300 zet an intihlum tih hriat a ni. An intihhlumna hmarua langsar tak 2 chu Digitas leh Exit tia hriat lar a ni a, hemi hmang hian mi tam takin mahni nunna lain an lo intihlum tawh a ni.
Switzerland sawrkar chuan kum rei tak chhung natna tuarte leh mahni kut leh ke pawh hmang theilova nun beidawnga khawvel hun hmang mekte chu a intihhlum a phalsak a, an intihhlumna hmanrua atan Exit International chuan bawm a siam zui ta tih Daily Mail chuan a tarlang.
Hemi bawm chhunga intihhlum tumte chu an intihhlum hmain thutlukna fel tak an siam hmasak a tul a, an thutlukna chu midangte thununna leh rilru hruaikawina tel lo a ni tur a ni tih danah chuan a chuang bawk a ni. Midangte fuihpawrhna leh nawrluihna avanga intihhlum tum te chu thih phalsak an ni lo thung a ni.
Mahni intihhlumna bawm hi “The Sarco Suicide Pods” tia hriat niin, a chhungah hian khawl tichetu tur leh intihlum tur mi 1 thutna a awm a, minute 1 chhungin na engmah tuar loin an thi nghal thei a ni.
