srael sipaiten Palestinian tleirawl man

Sipaite hian zing khawvar hmain Palestinian activist Tamimi-i te in hi dapin an man a, Thawhlehni tlai khan a nu Nariman pawh Ahed-ah an lo man tawh bawk.

Ahed Tamimi-i pa, Bassem chuan zing dar 3 velah Israel sipaite chuan an kawngkhar chu chumin an rawn au vak a, kawngka a hawn chuan sipaite chu inchhungah lutin, an inchhung an dap a, Tamimi-i an man tur thu an hrilh niin a sawi. Sipaite hian an motor-in Tamini hi an hruaichhuak nghal a ni. Bassem chuan an in dapnaah hian sipai 30 vel an tel niin a sawi.

Sipaite chuan Tamimi-te chhungkaw phone, computer leh laptop-te an laksak nghal bawk.

Ahed Tamimi hian kar kalta Zirtawpni-a US President Donald Trump-an Israel khawpui atana Jerusalem a puan duh lohna lantira Nabi Saleh-a nawrh huaihawtnaah Israel sipaite chu hnialin a tibuai a, Israel sipai thupuangtu chuan Tamimi-in sipaite a tibuai lai video pawh hi thehdarh a nih thu a sawi. He video thehdarh a nih hnu hian Israel mite chuan sipaite hnenah Tamimi hi man turin an phut a ni.

Nabi Saleh-ah han Zirtawpni apiangin Palestenian-te chuan Israel laka lungawi lohna an lantir ṭhin a, Ahed Tamimi hi he  hunah han kum kua mi lek a nih aṭangin a tel tawh a ni. Kum 13 a nihin, Turkey chuan Handala Courage Award a lo hlan tawh a ni.