China khawchhak lam tuipui, Shanghai khawpui bulah kar kalta Inrinni tlai khan oil tanker leh bungraw phur lawnglian an insu a, chin hriat lohin mi 32 an awm.
Panama register, Sanchi tanker hian Iran oil ton 136,000 zet a phur a, lawng nena an insut hnu hian a kang zui a ni.
China Ministry of Transport chuan chin hriat loha awmte hi tanker-a thawkte an ni a, Iran mi 30 leh Bangladesh mi pahnih an nih thu an tarlang.
Bungraw phur lawnga thawktu mi 21 te erawh chu him taka chhanchhuah an ni.
Ministry chuan Sanchi tanker-in a phurh oil te hi tuipuiah a baw nasa hle tih a sawi a, chin hriat loha awmte zawn hna pawh thawh chhunzawm zel a nih thu a sawi. Chhanchhuah hna thawk tur hian China lawng lian pariat tirh an ni a, South Korea pawhin pui turin coast guard lawng leh helicopter a tir bawk.
Tanker hi Kharg Island, Iran aṭanga Daesan, South Korea pan tur a ni. Bungraw phur lawng, Hong Kong resigter, CF Cyrstan hi US aṭanga China chhim lam, Guandong province pan tur a ni a, bungrua ton 64,000 vel a phur bawk a ni.
credit, vanglaini