Sawrkar Dan Bawhchhia A Puh Ex President Donald Trump Chu Kum 10 Chhung Jail Tang Thei Dinhmunah A Ding Mek
Expert te sawidanin, US Ex President Donald Trump chu ram leh ram inenthlakna dan (Espionage Act) bawhchhia a puh niin, he an puhnaah hian thiam loh a chang a nih chuan kum 10 chhung jail tang thei dinhmunah a ding mek tih hriat a ni.
Legal Analyst Lisa Rubin chuan, ‘The Rachel Maddow Show’-ah a inlan laiin, former US President Trump chuan ram dan 3 bawhchhiat a nei niin a sawi a, heng dan a bawhchhiat zingah hian pakhat chu kum tam tak jail tan theihna a tling tih a sawichhuak a ni.
President Trump hi a hmain January 6 a riots thlengah khan thubuai siamsak a ni tawh a, hemi tum hian amah thlawptu pawlte chuan buaina namenlo an chawk chhuak a ni.
The Guardian in a tarlan danin, hmanni lawk khan FBI te chuan Donald Trump chenna in Florida a awm Mar-a-Lago chu an dap a, White House atanga sawrkar lehkha pawimawh sawnchhuak a puh a nih avangin FBI chuan he thil hi chhui zuiin a chenna in chu an dap zui a ni.
Trump chenna in Mar-a-Lago FBI ten an dah lai hian ‘Classified information’ items an man nual niin an sawi bawk.
A chenna in FBI ten an dah chungchang chu Trump chuan ziaka thai langin, a chenna in mawi tak Florida, Palm Beach a mi chu FBI in manin an luah mek tih a sawi a ni. Heng ang thil hi US President lo ni tawh te chunga thil thleng ngai lo a ni tiin, FBI chetdan a dem thu Trump chuan a sawilang bawk a ni.
