Your Daily News

Ruihlo Dona Kawnga An Mi Thatte Thihnaah Mawh A Phur Ngam Tih Duterte’an A Sawichhuak

0 158

Khawvel ram hruaitute zinga che pa ve tak Philippines president Duterte chuan ramchhunga ruihlo doa hma an lakna kawngah an mi kahhlumte thihnaah mawh a phur ngam tih huai takin a sawi.

Mahni mihringpui pawisawilote chungah diklo taka a che a nih ngawt loh chuan ruihlo dona avanga ram tana hna a thawhna avang chuan tân in luh ngai hial khawpin thiamloh chang dawn mahsela pawi a tih loh thu a sawilang bawk.

President Rodrigo Duterte hian 2016 kuma Office a luah hnu khan ruihlo chu an ram hmelma lianber a ni tiin theih tawp chhuahin a do a, misualte chu dimdawihna tel hauh loin an nunna hial pawh lak huam khawpin a hmachhawn hmiah zel mai a ni.

Thawhtan zan khan he thu hi Television kaltlangin a sawi chhuaka, a tawngkam chhuak atanga chiang taka lang chu ruihlo dona a kalpui dan rorum tak avang hian amah ngei pawh thiamloh chang thei reng a ni tih chu a chiang viau awm e.

2016 kum laihawl vela thuneihna a chan atangin damdawi leh ruihloa sumdawng thin mi 6000 dawn a that tawh tih police-te chuan an sawia mahse, mi thi zat chu right watchdogs lam chuan a tam mah mah niin an tarlang ve thung.

“Ruihlo avanga thihna a thlen chuan a mawhphurtu pakhat ka ni tih hria ula, ruihlo dona avanga thihna a lo thlenin kawng engkimah mawh phurtu ka ni” tiin Duterte chuan a sawi nghe nghe.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!