Palestinian-te chuan Greek Orthodox puithiam pakhat chu Israel hnenah biak-in ram hralhah puhin, kar kalta Inrinni khan lungawi lohna lantirin Bethlehem-ah kawng an zawh.
Lungawi lohna lantira kawngzawh hi West Bank-a Bethlehem khua Manger Square-ah neih ani a, pungkhawmte hian Theophilos III convoy chu beiin, artuiten an vawm a ni.
Theophilos III hi Orthodox Krismas urlawk puala Church of Navitity-a inkhawmnaa tel turin a kal a ni. Orthodox Kristian-te hian Isua Krista pian champha, Krismas hi January 7-ah an hmang ṭhin a ni.
Greek Orthodox puithiam hi tunhnaiah chhiah awl a nih theih nan an kohhran ram hralh chungchangah a hming a lang a, heng a ram hralhte hi Israel sumdawngte kutah a lut dawn nia sawi a ni. September thla khan Theophilos III chu settler organistation thurualpuiah puhin a lakah lungawi lohna hi an lo lantir tawh bawk a ni.
Settler group, Ateret Cohanim hian hun rei tak aṭang khan Palestinian-te chu Bethlehem khua-a an in leh sumdawnna hmun aṭanga chhuahtir tumin an lo bei tawh a, al-Aqsa Mosque bul vela chengte pawh chhuahtir an lo tum tawh bawk.
Greek Orthodox Church of Jerusalem chuan Palestinian-te puhna chu thu dik lo niin a sawi thung a, an ram chu Israel mite hnenah an hralh lo niin an sawi. Orthodox Church hi East Jerusalem-a ram nei zau ber dawttu a ni a, Palestinian-te chuan an ramte Israel hnenah an hralh chuan Palestinian state a din huna an khawpui atana East Jerusalem hman an tumna thlengin nghawng a neih an hlauhthawng a ni.
credit, vanglaini