Oscar-ah A Nupui Sam Fiamthu Thawh Nana Hmangtu Chris Rock Chu Will Smith-a’n A Hmaiah Tak A Beng. Academy Lamin Awka An Nei Nghal!
Oscar 2022-ah Actor Will Smith chu a lemchan Richard King chuan mipa lemchan thiam ber Best actor chawimawina a hlawhchhuahsak a ni.
Hetih lai hian Oscar 2022 a mi mit latu ber pakhat chu Will Smith-a’n a nupui Jada Pinkett Smith sam fiamthu thawh nana hmangtu, fiamthu thiam Chris Rock chu a hmaiah tak a beng tih an sawi.
Will Smith-a’n Chris Rock a ben lai clip hi social media lamah a darh nghal thuaia, a thenten Best actor chawimawina dawngtu leh The Fresh Price of Bel-Air actor Will Smith sawiselna awka an chhuah laiin, milar tam zawk mah chuan an thlawp thu an auchhuahpui ve thung.
Chris Rock chuan Will Smith nupui Jada Pinkett Smith lu kawlh chu fiamthu thawh nan a hmang a, “GI Jane” a ang tiin a sawisel a ni. Dawhsan atanga a thutna ah a kir leh hnu chuan “Ka nupui hming kha sawi ve chhen suh” tiin Will Smith chuan Chris chu a aukhum zui nghal ani.
He thil thleng chungchangah hian Academy lam chuan thuchhuah an siam ve nghal a, an hun hlu tak an hman meknaah tharum thawhna leh mi tihnatna lam hawi zawnga chetna chu engtizawng maha an pawm loh thu an tarlang tih hriat a ni.
Jada Pinkett hian kum 3 liam ta atang khan a sam a hloh nasa hle a, alopecia an tih mai sam tlakkawlhna natna a nei a, a sam mehkawlh law law chu a thlang ta zawk a ni.
