Your Daily News

NKorea-in Olympics-ah infiammi 22 tir dawn

0 394

Korea ram pahnih aiawhten inbiakna an neihah February thla-a South Korea-a Winter Olympics neih turah NKorea chuan palai leh infiammi tirh a remti a, an inremna siam hi International Olympic Committee chuan pawmsakin, NKorea chuan infiammi 22 a tirh tur thu a sawi.

South Korea chuan February 9 aṭanga Pyeongchang-a Winter Olympics neih tur chu ram pahnihte inkar boruak chhia tihziaawmna hmanruaah hman theih a beisei a ni. Hemi chungchang hi ram pahnih aiawhten sawidunin, inremna pawh an siam a, opening ceremony-ah pawh ram pahnih aiawhte chu flag pakhat hnuaia kal ho tir a, joint women hockey team siam pawh an remti bawk.  Mahse Olympics-a NKorea telh chungchang hi IOC in a pawmpui ve leh phawt a ngai a, Inrinni khan IOC chuan Korea ram pahniha Olympic committe hruaitute,  Pyeongchang 2018 organiser, sorkar official-te a kawm hnuah a pawmpui thu hi IOC President Thomas Bach chuan a puang ta a ni.

IOC-in a pawmpui  hnua NKorea infiammi 22 tel turte hi discipline panga-ah an tel dawn a, figure skating, short-track speed skating, cross-country skiing leh Alpine skiing bakah joint women hockey teamah an tel dawn a ni.

NKorea hian infiammi bakah cheerleader, performer leh cultural envoy 550 a tir dawn bawk a, an ni bakah hian official 24 leh media representative 21 an kal bawk ang. Heng mite hian IOC accreditation an dawng vek dawn niin Bach chuan a sawi.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!