Your Daily News

Mittui Nen Ui Tak Chunga A Pasal Vuiliamtu Nu Pakhat Chuan Ni 4 Hnuah Nungdamin A Hmu Leh!

0 675

Mittui tla chunga a pasal vuiliamtu nu pakhat chuan ni 4 liam hnuah a pasal thi tawha ngaih kum 65 mi chu nungdamin a hmu leh tih a tarlang.

Honduras, El Carrmen a khawsa nu pakhat Victoria Sarmiento chuan a pasal Julio kum 65 mi chu ni engemaw zat inah a haw tawh loh avangin an zawng nasa hle tih a sawi. Vanduaithlak takin a pasal chu Covid-19 avangin a boral tawh tih damdawi ina thawkten an lo hrilh a, lehkha pawimawhte pawh lachhuak nghal turin an lo hrilh a ni.

Hospital de Occidente ah a pasal ruang chu enfiahna hun remchang an siamsak a, a ruang chu mel 30 a hla an khua ah dahphei turin Funeral director hnenah ngenna a siam zui ta a ni. A pasal ruang an khua phurh thlen nan hian £230 a sengral niin a sawi bawk.

Sarmiento chu a pasal ngaia khawhar taka mittui nen hun a hman mek lai leh a pasal an vuiliam atanga ni 4 awrh a liam tihah mak tak maiin a pasal chu in lamah a lo haw leh ta a ni. A pasal Julio chu a thi ni lovin, an khaw thenawm ramhnuaiah tawhsual tawkin hliam na tak a tuar a, in lamah a haw thei tawh lo niin a sawi. A pasal Julio chu a tei hawi laiin a tlu palh hlauh maia, a thawh theih lawk loh avangin chaw leh tui telloin ni engemaw zat amahin hun a hmang a ni.

Mrs Sarmiento chuan ni 4 liam ta a, a pasal an vuiliam tawh chu a pasal dik tak a nilo tih sawiin, a pasal dik tak chu tunah a hmu leh ta tih Honduras’s Laprenza newspaper a hrilh nghe nghe. A pasal nilo zawk ruang vui nana a sensote chu damdawi in thuneituten an rulh let leh ngei a ngai dawn tih a tarlang bawk.

An sawidanin a pasal Julio hmel leh COVID-19 avanga thi ta hmel chu a in ang hle mai a, hriat hran an har hle niin an sawi. Mithi vuina hun an hman lai pawh hian Sarmiento fate chuan pa ber Julio ruang anga an sawi chu rinhlelhna an lo nei ve bawk niin an sawi.

Hospital director Juan Carlos Cordana chuan Mrs Sarmiento chu mithi ruang hresualtu zawk a ni tih a sawi ve bawk. Lehkha pawimawh leh a ID an enmilh lai pawhin mithi chu a pasal ngei a nih thu a sawi lang niin a tarlang bawk.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!