Hmeichhe pakhat naupang thah vanga West Yorkshire, Wakefields a New Hall lungin a tang mek chu tang vengtu Lain Cocks kum 51 chuan tanin insukna hmunah vanram tlafual a chenpui thin a, mahse kum hnih hnuah a vanram tlafual chen chu a tawp ta. Lain Cocks hi nupui nei lai a ni a, tan in ah hian kum 20 lai a thawk tawh a ni. Mahse a thil tih sual chuan a vawlet a court ah a chungthu rel sak a ni.
Lain Cocks hian tang hmeichiate hnenah amah an mutpui chuan tanin chhungah zalen taka an awm theih tur thu hmanga a thlem thin thu judge chuan a sawi lang. Lain Cocks chuan naupang thah vanga tang pakhat chu kum 2015 khan insukna hmunah a thlem tlu a, a vawihnihna chu 2016 january ni 6 zan khan a roomah a va mutpui leh thu hriat ani bawk.
Rinhlelh anih hnuah Lain Cocks chuan hmeichhe hnenah chuan thuneitute hnena engmah sawi lo turin a vau bawk a ni. Lain Cocks chuan hmeichhe pakhat chauh a duh tawk lo a hmeichhe dang pakhat pawh a khuaikhem leh a, mahse a pahnihna hi chu hmelchhia a tih deuh avangin room chhunga a lo inchei nalh theih nan make up pawh a lei sak thu hriat a ni bawk.
Lain Cocks thil tih sual hi tanin chhunga a hmeichhe khuaikhem zinga pathumna chuan tanin atanga a chhuah hnuah court ah thu a thlen avangin hriat chhuah a lo nita a ni. Judge Simon Phillips QC chuan Lain Cocks chu thu neihna hmangsuala hmeichhiate ti nawmnahtu tia thiam loh chantirin kum 4 chhung lungin tang turin thiam loh a chan tir a ni. Lain Cocks nupui chuan a pasal chunga thil thleng chu a nu, a fapa leh a tu te tana thil lungchhiat thlak tak leh hmingchhiatna a thlen theih dawn avangin Lain Cocks a hremna chu ti nep deuh turin court hnenah a dil.