Your Daily News

Kungfu Lalpa Tih Theih Hial Bruce Lee Chanchin

0 703

Bruce Lee hi San Francisco, USA-ah November ni 27 kum 1940 khan zaithiam Lee Hoi Chuena fapa palina ni turin a lo piang a, an unau hi mipa pahnih leh hmeichhia pahnih an ni a, sakhaw lamah chuan Catholic an ni. A hming hmasa chu Li Chen Fang a ni a, a lo pian hnu lawkah hian USA atangin Hong Kong-ah an pem chho leh a. Nausen hnute hne lai a nih atang daih tawhin film a lo chang daih tawh a, kum ruk mi a nihin a chang leh bawk a ni. Kum 7 a nihin Hong Konga school tha ber pawl Lhasa-ah an dah a, mahse zirna lam a ngaihsak hlei thei meuh lo, infiamna lamin a rilru a hruai nasa zawkin a bei ngawrh nasa a, a pa hriat miah lohin Boxing a lo zir ru a, a pain a hriatchhuah chuan a zilh hrep a, mahse a zirlai tibuai lova martial arts a zir chu a phalsak ta nge nge a.

Kum 1959 kumah Matrict a pass a, USA-ah kalin Washington State University-ah Psychology leh Philosophy a zir a, an University Press-ah thla khata US Dollar 20 hlawhin a thawk a, mahni inchawm chawpin lehkha a zir a, a hun awlah Martial Arts a practice reng thin. Karate hi All Karate Championship-a vawi sarih lo champion tawh Chuck Norris hnenah a zir a, Hapkido hi Black Belt 7th Dan Wang Ing Sik Korean mi hnenah a zir thin bawk a.

Press-a a hlawh chu a kham loh em avangin kawngpui dung zau laiah martial arts chu a zirtir tan ve ta a, mi pakhat $ 15 vel thlakhatah a la thin a, vanneih asiamin kum 1964 khan Long Beach Karate Championship a awm hlauh a, tah chuan tel vein a champion a, chuvang chuan a hnena rawn zir duh an pung hluai mai a, darkar khat zirtir manah $ 270 te, Special-ah $ 1000 te’n an rawn zir sup sup ta mai a ni.
Long Beach karate Championship-a Champion a nih avang chuan TV Producers pakhatin Bat Man chang turin an rawn sawm a, hemi hnu hian The Green Hornet-ah Kato-a lemah a chang leh a.
Heng hunlai hian Asia Film hi khawvelin a ngaisang lo viau mai a, a chhan chu thlawk fua fua leh awihawm loh lutuka an chan thin vang a ni awm e. Chutih lai chuan Golden Harvest Group chuan bung thar keu tumin Film Star tur an zawng khawm a, an Director Lo Wei nupui Liu Lien Woi chu Bruce Lee awmna America-ah chuan a rawn kal a, Bruce Lee-in Martial Arts a lo zirtir lai chu a hmuhin a lung a dum ta hle mai a, Golden Harvest Group zawm tur chuan a sawm chawt mai a.

Heng hunlai hian khawthlang lam miten Chinese mi an hmuh dan chu Opium zuk hmang leh ei ching niin an hmu a, an film pawh en sak tlakah an ngai lo a ni. Hei vang hian Bruce Lee hi a tlawmngai em em a, Golden Harvest Group sawmna chu ihe lo chuan a pawm hmiah mai a.
Hong Kong lam pan chuan a haw chho ta a, an thlen veleh chuan Thailand-ah kalin The Big Boss tih film chu an chang chho ta a, a hit em em mai a, Hong Kong cinema Hall-ah chuan thlakhat tawp an chhuah a, Hong Kong Cinema Hall-a film chhuah rei ber record dinglai chu an khum nghal pang mai a, Hong Kong $ 33,00,000 an huilut mai chu Golden Harvest khaipa Raymond Chow pawh a meng phar hle ni tur a ni.

Kum 1971-ah Fist of Fury an chang tan leh a, mahse Martial Arts kaihhruaina key tihlan a tum dan chu an Director Lo Wei chuan a remtihsak ta lo a, lunghnur takin an chang chhuak a, mahse khawvel pumah chuan a lar chho tan ta a.

Bruce Lee rilru na chu a dam thei ngang lo a, Fist of Fury an launched lai vel chu an director Lo Wei nen chuan an inhau ta a, kumkhuaa inthen turin a chhuahsan ta a, ama pualin SHEH HO Company a din ve ta a, mahse Golden Harvest Group neitupa Raymond Chow chuan Bruce Lee talent chu a hmuh chian em avangin thawhpuiah a sawm a, SHEH HO Company mamawh apiang Raymond Chow in a theh chhuah sak zel anga, mahse an fim siam apiang chu Golden Harvest Company Presentation atanga pekchhuah turin agreement an siam a.

Lo Wei chu a vanduai tan ta a, a nupui hmangaih em em chuan Bruce Lee chutia amah vanga a chhuak ta chu a khak a, ani lahin a lo ngaithiam si lo. An inhau ta a, an inthen zui chu a ni mai a, film star lamin an belbul duh tawh hek lo a, a hming lemah The Single Wolf an vuah a, heng a vanduaina chhan hi Bruce Lee vang niin a ngai a, chanchinbu lamah a chanchin chhe zawngin a ziak nasa hle niin an sawi.

Bruce Lee erawh chu SHEH HO Company atang chuan The Way of Dragon an chang ta a. Nora Miao leh Chuck Norris nen an chang ho a, hei chuan khawthlang lam pawh a nghawr nghing hneh hle mai. Khawchhak lam ngainep em emtu te pawhin hmuhnawm ti-in an en thuap mai a, film lar Papillon, God Father te ai pawhin a nep bik lo an ti a, an launched atangah karkhat lekah Hong Kong Dollar nuai sawmnga a hmu nghal pang mai a ni.

Bruce Lee-a film en duh vangin khawvel khawpui lar deuh deuhte Cinema Hall chu a lun ta hle mai a, Golden Harvest chuan Bruce Lee film Copy chu an thawn chhuak ta chur chur mai a ni. Hollywood lam an rawn lang a, Warner Brothers in film siampuiah an rawn sawm a, Enter the Dragon an chang a, hei zet chu America khawmualpui leh Europe a nghawr dawt dawt a ni ber e. Cinema Hall lian pui pui zanga in a rualin an chhuah thin ang a ni ti khawpin a lar.

Enter the Dragon film an siam zawh chuan The Games of Death an buaipui chho leh ta a, Film star lar George Lazenby leh Negro pa sang feet 7.4 a sang Raoul Jabber te nen an chang ho a, he film an buaipui lai hian a thi thut mai a ni.
The Way of the Dragon an chan lai khan Studio-ah hna an thawh laiin a luhai a tlu tawp mai a, damdawiin lamah an admit zui a, Doctor te chuan a taksa a rimtawng lutuk a ni tiin a kungfu practice chu chawl rih turin an ti a, mahse a hna a laklawh si a, Enter the Dragon film an siam zawh hnu-ah a chawl ang tiin decision a siam a, mahse The Games of Death an chan chhunzawm leh ta mai si a, a taksa in a tuar ta lo ni berin a lang.

July ni 20 1973 a ni a, Hotel Parlour-ah George Lazenby, Raoul Jabber, Betty Ting Pei leh Raymond Chow te nen an film siam lai sawi ho turin an inti a, George te an lo nghah lai chuan Bruce Lee chuan, “Ka lu a na, damdawi i nei em?” tiin Betty chu a zawt a, ani chuan nachhawkna a pe a, Betty khumah chuan a lo va mu hahdam a, Raymond Chow leh Betty te chuan George te lo kal chu an lo nghak reng a, an lo thlen theih si loh avangin Raymond chow chuan Betty leh Bruce Lee te chu a kalsan a.

Betty chuan Bruce Lee chu a han ngaihven a, kaihthawh a han tum a, mahse a tho thei lo a, a mangang chuan a doctor rawih a han bia a, inah a lo awm lo hlauh a, Queen Elizabeth’s Hospital lamah an phur phei ta a. Doctor te chuan theihtawp an chhuah nachungin zan dar 11:15 PM ah chuan a nupui Linda Lee Anglo Swiss mi leh a fanu Li Shang Lin leh a fapa Li Kurt Howe(Brandon Lee) te chu a kalsan ta a ni.

Bruce Lee thih dan hi Hong Kong chanchinbu lian lamin a diriam thei ang leh dik lo takin an chhuah a, chanchinbu pakhat chuan Betty nen sex an hmang dun a, Bruce Lee in damdawi a hman vangin a thi a ni a ti a, mahse sawrkarin Hong Kong Dollar 10,00,000 lawih an chawitir a, chanchinbu dang pawh na takin a zilh a ni.
July ni 22, 1973 tlai lam dar 3:30-ah chuan Oakland khuaa Catholic Cemetry-ah vui liam a ni a, a thih ni hian mipui singnga dawn thawin an vui liam a, United State-a Chinese mi an kal vek a, chumai ani lo. Mingo leh mihang singhnih dawn an rawn pungkhawm bawk a, California state-ah chuan vuitu a la ngah ber ang tih khawpin mi an tam.

Mak tak mai chu Bruce Lee thih hma khan ruah a cheng reng a, mahse a thih tukah chuan khua a tha hlauh nia. Bruce Lee a ngaihsanawmna em em chu khawthlang lamin khawchhak film engahmah a ngaih loh laiin a film in khawvel a deng chhuak a, midang kungfu star lar Jet Li, Jackie Chan te tan nasa takin kawng a lo sial hi a ni.

-Apuia Tochhawng

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com
error: Content is protected !!