Mi hausa 42 leh mi tluklehdingawn 3.7-te hausakna intluk!
Mi rethei leh hausa inkar zauh zia an sawi fo ṭhin a, sawi mai ai hian a tak takah chuan a lo la zau zawk emaw tih mai tur a ni. Charitable organization Oxfam-in report a siamah chuan, khawvel mi hausa 42-te hausakna leh mi rethei tluklehdingawn 3.7-te ro sum neih hlut zawng belhkhawm chu a inzat vel a ni!
Khawvel mihring zawng zawng hi tluklehdingawn 7.6 vel nia chhut a ni a, chumi zat ve vel te hausakna leh khawvela mi hausa zual 42-te hausakna chu a intluk tihna a ni. Report-in a tarlan dan chuan kum 2017 chhung khan heng mirethei tluklehdingawn tam takte hausakna hi a pun loh laiin, khawvel hausakna punna 82% zet chu mi hausa zualte thawhchhuah a ni lawi si. Chung mite chu khawvel mihring awm zat aṭang chhuta 1% vel chauh an ni.
Oxfam chuan an zirchhiana report hi World Economic Forum annual meeting, Davos, Switzerland-a neih zawh takah khan an tlangzarh a ni. Oxfam executive director Winnie Byanyima chuan, “Mi hausate hausakna a pung thur thur a, rim taka thawk mirethei maktaduai tam takte hausakna erawh a pung chak lo hle a ni” a ti. “Hei hian hmasawna a khairual lo a, a hausa te an lian zel a, mi rethei te retheina erawh a zual zel si a ni. Chhiah dik taka pe lote avang hian rethei leh hausa inkar a zau zel a ni” a ti bawk.
Forbes rich list thar berah khan khawvela hausa ber chu Microsoft neitu pa Bill Gates a ni a, Facebook hmuchhuaktu Mark Zuckerberg leh Amazon neitu Jeff Bezos-te pawh a hausa zual panga zingah an lang. Khawvel mi hausa zual 10-te hi U.S khua leh tui deuh vek an ni a, Spain leh Mexico mi pakhat ve ve an lang ve chauh a ni. Hei mai hi a la ni lo a, United States-a mihausa pathum te hausakna belhkhawm chu a ram mipui zahve dawn huasakna nen a intluk tawk thuak a ni.
India dinhmun
Khawvel hmun dang ang bawkin India-ah pawh mi rethei leh hausa inkar a zau hle a, Oxfam report aṭanga a lan dan chuan kum 2017 chhunga India hausakna punna 73% zet chu mi hausa tawntaw 1% te thawhchhuah a ni. Reliance Industries Limited (RIL) chairman Mukesh Ambani chu mi mala hausa ber niin, Wipro Limited chairman Azim Premji chuan a dawt. Ram dang ang bawkin India mihausate hi sumdawng an ni fur a, company lian tak tak neite an ni hlawm. Mi hausaten sum leh pai an ngah em em lai hian hmun tam takah ‘Slum Area’ hmuh tur a la awm a, ei tur kham khawp hmuh loh vanga thi an la awm reng bawk. India hi khawvela mi rethei leh hausa inthlauhna ber ram zinga sawi tel ṭhin a ni a, hei hi tunah pawh a la danglam chuang lo. Ram economy ṭhangchak chak ber ber zingah tel mah se a ram mipui nawlpui te chu ram dang mite khawsakna nena khai khin chuan a la hniam viau bawk.