Khawvel Hmun Hrang Hrangah Fa 600 Zet Neia Chi A Thlah Hnuin Chi Thlah Tawh Lo Turin Court-in A Hriattir
Dutch pa Jonathan Meijer kum 41 a upa chu khawvel hmun hrang hrangah fa 600 neia chi a thlah hnuah chi thlah tawh lo tura tih a ni.
Dutch court chuan Jonathan Meijer chu clinic lamah chi (semen) donate tawh lo turin a hriattir a, vawikhat dan bawhchhiatah euros 100,000 zel chawi tura tih a ni bawk. Judges te pawhin ram pawn clinic te chu Meijer chi an kawlsa pawh tichhe nghal turin thu a pe bawk.
He thutlukna hi donor children foundation leh Dutch parents ten civil case an file vanga ti an nih thu an sawi a, Mr Meijer chu chi donate tawh lo tura tih a nih chhan pawh heng Meijer thlah te hi nupui/pasal zawn kawngah bahlahna an neih an hlauh bakah, thisen inhnaih tak ni siin chi an inthlahtir an hlauh vang a ni.
Meijer chuan 2017 kum atang khan chi a donate tan a, Dutch Fertility Clinics ah fa 100 a neih hnuin chi donate tawh lo tura order tihchhuah a ni.
Mahse, hemi hnu hian Jonathan Meijer chuan ram pawn clinic lamah a chi a donate chhunzawm zel tih hriat chhuah a ni a, heng clinic zingah hian Danish sperm bank Cryos chu khawvel pum huapa chi donate-na niin, social media leh Website kaltlangin he thil hi an kalpui tih Dutch news website Algemeen Dagblad chuan a tarlang a ni. Ukraine-ah pawh Meijer hian a chi a donate thin tih an sawi.
