Your Daily News

INDO TURIN INPEIH RAWH ULE

0 1,018

INDO TURIN INPEIH RAWH ULE”
(SO YOU GOTTA BE READY)
-Gen. James Mattis, US Defense Secy

US Defense Secy Gen. James Mattis chuan Fort Bragg, North Carolina state hmuna US military te tlawhin, North Korea do tura inbuatsaihna chu peih a ni tawh tih hrilhin, “Korean Peninsula ah chuan indo tura inbuatsaihna (storm clouds) chu a zing chuai mek a, engkim ruahmanna chu peih a ni tawh” tiin, diplomatic hmanga North Korea nuclear & missile program tihtawpna tur (nuclear standoff) a hlawhchham palh vaih chuan, America chuan a thu leh hla te chu sipai chakna (armed forces) ten a thlawp zui dawn a ni, a ti.

Hetianga US Defense Secy James Mattis meuhvin US military te a fuih ta hian, US chuan North Korea chu a vel hreh dawn hauhlo tih a tichiangtaah ngaih a ni. “Ka pu Sai sawm kap, dawl zawr angin ka zawr” a tih hun hi North Korea hian a hlat lo tial tial niin alang.

James Mattis chuan, “Ka sipai thalai duhawm tak tak te u (My fine young soldiers), kan diplomats ten thuneihna nena indo pumpelhna tura kawng an zawn a hlawhchham palh vaih chuan, indo turin kan inpeih a ni” a ti. Fort Bragg ah hian 82nd Airborne Division’s Hall of Heroes hmuna sipai awmte chu ni 2 chamin a tlawh a ni.

Tunkar Zirtawpni khan US chuan UN Security Council thu pass turin draft-resolution a siam a, hei hi a khauh (tough) tiuh teuh hle a ni (MSR ah post tawh a ni e-CT). He resolution hi a hlawhtlin theih nan US military te chu an inbuatsaih peih tihna a ni.

James Mattis chuan Fort Bragg hmuna US sipaite chu Korean War zawh tirh 1963 daih tawha T.R Fehrenbach’s military classic “This Kind of War: A Study in Unpreparedness” tih chu chhiar turin a fuih hlawm bawk. Pentagon chief ber Mattis a thusawi chu sipaiten bengsikin an ngaithla thap mai a, US sipai raldo mite chu “So you gotta be ready” (Indona hmuna kal mai turin inpeih rawh ule) a ti ta a ni. Indo turin taksa, taksa leh thlarauva inpeih turin a hriattir a ni ber mai.

James Mattis hi Marine Corps ah General niin, mi huaisen leh fing, hlauh neilo, Iraq War ah pawh lo che tla hrep mai, Falujjah city beihnaa hotu ber niin a hming koh duat nan “General James ‘Mad-Dog’ Mattis” tiin an ko mai thin a ni. Tunkar liamta khan Defense Secy Mattis hian Guantanamo Bay (Cuba) a Naval Base, Naval Station Mayport (Florida), Camp Lejeuve leh Fort Bragg (North Carolina) te a tlawh a; North Korea beihna tura inbuatsaihna peih a nih thu a hrilh ni bera ngaih a ni.

US chuan South Korea ah military 28,000 a dah sa tawh a, hengho chhungte hi hmun him zawka sawn chhuahna tura ruahmanna pawh tihfel tawh a ni a, mahse, tun maiah chuan nunauho hi sawn chhuah chuk chuk an tum rih lo. US in North Korea hi tuipui leh lei lam (ground force) bakah airstrike nena beih a tum nasat dawn vangin, fimkhur takin ruahmanna a kal pui mek a ni. Mattis chuan, “Diplomacy hmanga chin fel theih chu kan duh ber a la ni reng a, hun tlem chu a la awm a ni” a ti.

MsR@CT Lalrinawma

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!