Southern Kazakhstan, Saryagash-ah hmeichhe tleirawl lehkha zirlai chu Bazar tura a kal a haw lam chu mipa 17 in an rukbo hnuah ni 4 chhung hrenbeh niin, an pawngsual rawn tih an sawi.
Hmeichhe tleirawl tawrhna leh a chunga thil thleng chu mite hriatah a darh zuia, pawngsual a tawh atanga 5 thla liam hnuah pawh Police ten heng pawikhawihtute hi an la man thei rih lo niin an sawi. He thil duhawm lo tak hi kum in May thlaa thleng niin, hmeichhe tleirawl hi a bazar a kal a haw lam chu Taxi driver in damdawi ruihtheiha a hrai ruih hnuah pawngsualna rapthlak tak a tawk zui ta a ni tih amah tleirawl ngeiin a sawichhuak a ni.
Bazar atanga a taxi laa a haw mek laiin, driver chuan a kalkawng a thlak thut tih sawiin, nasa takin a tap zui a, driver chuan hahdam turin a ngen a, tui in tur Bottle a pe a reivak lo hnuah nikhawhreloin a awm zui ta a ni. Hmeichhe tleirawlin tualchhung TV Station KTK a hrilh danin, a rawn harh chhuah meuh chuan tuipui kamah a lo let reng tih a sawi a, saruak a nih bakah mipa thahnem takin an lo hual thap a ti bawk. Lui kamah an pawngsual hnuin in lama an la sawn leh tih a sawi.
In lamah an ni 4 chhung an hrenbeh chhung hian, amah pawngsualtute chuan mipa dang an sawmkhawm thin tih a sawi a, ran ang maiin chintawk an neilo hle a ti bawk. Mipa te chu a hnialkalh a nih vaih chuan thatah an vau zui a, a ruang chu luiah tumah hmuhlohnaah an paih dawn a ni tiin a vau zui bawk.
He pawngsual thubuai kaihhnawihah hian Police ten misual man an la nei lova, thubuai chhuina a kal mek zel tih thuneitute chuan an tarlang. Police te chuan hnuchhuina kawngah harsatna an tawhna chhan chu tleirawl nu chuan finfiahna awm ang angte a lo tichhe vek niin an tarlang bawk.
