Hmeichhe Raipuarin A Pasal A Lainat Em Avangin A Remtihnain A Pasal Tan Nupui 2-na Tur A Zawnsak

Nupa nuna thil buaithlak tak mai chu thikthu chhiat over-na hi a ni awm e. Nu tam zawk chuan ngaihzawng neih chu sawiloh, an pasalten hmeichhe dang an biak ringawt pawn an thinrim thei zu nia!

Mahse, hmeichhia theuh theuh pawh a inanloh theih hle mai. Malaysia, Shah Alam-a nu pakhat naupai mek Khuzatul Atiqah erawh chuan a naupai laiin a pasal Samuel Dzul chu a lainat luatna lamah nupui dang a zawnsak hmak tih an sawi.

Samuel Dzul hi Office hna nei a ni a, in a lo haw chuan a chauin a buai thei hle tih an sawi a. A chhan pawh a nupui Khuzatul Atiqah chuan nau a pai si a, duhthusamin inchhung hna a thawh theih loh bakah, a pasal pawh a care tha hlei thei lo a ni.

Khuzatul Atiqah chuan a pasal Samuel chu a hmangaih tak zet a, naute a pai avanga a enkawl tha hlei thei lo chu lainatawm a tiin a khawngaih ta em em mai a ni. Uluk taka a ngaihtuah hnuah a pasal care-tu tur leh a nupui 2 na tur zawnsak zai a rel ta a ni. Samuel pawh chuan a nupui rawtna chu tha a tihpuia a nupui 2 na tur mo thar Nur Fathonah chu an inchhungah a lalut ta tih an sawi.

Samuel te chhungkua hi Muslim chhungkua an ni a, nupui thar a nei ta pawh chu mak an tihran lo. Netizens te barakhaih zawktu erawh a nupui raipuarin nupui dang nei tura thutlukna a siam ta zawk chu mak an ti hle thung.