January 21, 2022 liam ta khan NYPD Officer Rivera leh a kawppui Wilbert Mora te chu misual pakhatin New York City-ah a ambush thut mai a, Police officer Jason Rivera chu silai nen beih a nia, hun engemaw chen a inenkawl hnuah a boral zui ta a ni.
Tianga officer Jason Rivera misual kut tuara a thih hnu hian, a nupui a kalsan tak Dominique Luzuriaga Rivera chuan naute a pai a, a naupai mek chu a pian hma hauhin First Responders Children’s Foundation chuan college scholarship $20,000 an pe tih an sawi.
Naute paitunu Luzuriaga sawidanin, a pasal chi chu lain IVF kaltlangin naute hi a pai niin a sawi a, a pasal kum 22 mi Jason Rivera chu damdawi ina a awm lai leh a thih hmain a chi an lakchhuah thu a sawi a ni.
An sawidanin Police officer Rivera fa a nupuiin a pai mek hi thla leh mai hian piang tura chhut a ni a, First Responders Children’s Foundation lam chu rawn che chhuak ngalin, he naute lo piang tur zirna senso phuhhrukna tur scholarship chu an ruahmansak ta nghal a ni.
Officer Rivera naute lo piang tur hian zirna sang zawk bei turin sum leh paiah harsatna lutuk a tawk dawn lo tih he pawl hotu CEO Jilian Crane chuan New York Post a hrilh.
Jilian Crane chuan, Rivera chhungkaw tawrhna chu lakbosak theih an inrin loh thu leh an lungngaihna pawh an lakbosak theih dawn loh thu a sawi a, sum leh pai naute zirna senso tur erawh an lakkiansak ngei a beisei tih a tarlang a ni.
