Your Daily News

China Sawrkar Chuan COVID-19 Dân Bawhchhiate Chu Zahthlak Takin Hetiang Hian Vantlang Mit Hmuhah A Hrem

0 598

Khawvel ram tam takin COVID-19 hri a darh zel loh nan leh a ram mipuite him zawk nan dan leh dun an duang a, an dan duante chu zawm tlat turin mipuite an ngen chiam bawk. Mipuite nunna an hlut em avangin dan bawhchhiate chu hremna an pe thin a ni.

Virus lo chhuahna nia khawvelin a rinber China ramah pawh ram dang ang bawkin hrileng tur dan nan COVID-19 dan leh dun siam a ni ve bawk. China Guangxi region, Jingxi city-ah thuneitute chuan COVID-19 dan bawhchhiate chu na takin an chungah hremna an lekkawh tih hriat a ni a, an mihring zalenna leh dikna chanvo chuan awmzia a nei hauh lo.

Tualchhung thuneitute chuan dan bawhchhiate chu PPE suit ang deuh Hazmat thuam an haktir a, khawpui chhungah motor lian in an tlankual pui hmasa a, a hnuah kea kaltirin khawlaiah sipai ang maiin an lamtir vel a ni. Tiang an tihna chhan pawh mipui vantlang hmaah dan bawhchhiate chu zahthlak taka siam an duh vang ani.

Social media lama video darh chiam atanga a landanin, dan bawhchhiate hian an thlalak leh hming chuanna lehkha khawnga siam chu an nghawngah an awrh a, hnung lamah police hotu lianten an zui bawk a ni.

China sawrkar chuan 2010 kumah tuna dan bawhchhiate hremna an pek ang hi a lo kalpui leh tawh tih hriat a ni a, nawhchizuarte chu mipui vantlang hmaah zahthlak takin a lo hrem tawh tih an sawi. China sawrkarin dan bawhchhiate hremna a pek hi mi tam takin mihring dikna chanvo inrahbehsakna a ni tiin an sawisel nasa hle bawk a ni.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!