Chhungkawpa Kum 41 A Upa Chuan A Ngilneihna Lantira Varak Kawngkan Tur A Tanpuina Lamah A Nun A Chân!
California a khawsa chhungkawpa kum 41 a upa Casey Rivara chu an varak rual kawngkan tur a puihna lamah motor-in a suhlum tih hriat a ni.
He vanduaina thlen hun hi May 18, zan Dar 8:15pm bawr vel kha niin an sawi a, Rocklin, Park Drive leh Stanford Ranch Boulivard kawng peng thuamah tak Rivara chuan varak rual kawngkan tur puihin a car chu a park a, hetih lai hian driver tleirawl kum 17 miin a su zui ta niin Rocklin Police Department chuan press conference ah an tarlang a ni.
Tualchhung news outlet KCRA tarlan danin, Rivara chilhlumtu driver kum 17 mi hi he vanduaina thlen lai hian a tlanbo lem lo niin an sawi a, thil thlendan kimchang tak chhui zui nghal niin, Rivara chilhlumtu hi thubuai siamsak a ni lo thei bawk niin a ziak a ni.
He vanduaina thlen lai hian emergency first responders te chu vanduaina thlenna hmun Rocklin lam an rawn thleng nghal thuai a Rivara nunna erawh an chhan chhuak thei ta chuang lo a ni.
He thil thlendan mita hmutu mipa naupang kum 12 mi sawidanin, Rivara’an an varak rual kawngkan tur a puih lai hian car thahnem tak chu an ding thup mai a, Rivara thil tih chu lawmin an kut an beng dar dar hlawm a ti a ni. Mahse, minute reilote hnuah car pakhat chuan a rawn su zui ta a ni a ti.
KCRA in video an post atanga a landanin, he vanduaina thlenna hmunah hian vantlang mipui pungkhawmte chuan Rivara hriat rengna hun buatsaihin, varak lem siamchawp leh pangpar thahnem tak he hmunah hian an hnutchhiat a, Rivara chetdan leh a thil tih chu chhuanawm an tih thu an auchhuahpui a ni.
