Singer Britney Spears pasal hlui Kevin Federline chuan hmanni lawk khan interview a neihnaah, Britney Spears nena an neih an fapa te 2 in a nu an hmu duhlo nia a sawichhuah chungchangah, Britney Spears leh tuna a pasal Sam Asghari te chuan na takin an chhang let tih hriat a ni.
Kevin chuan DailyMail in interview a neihpuina, tunkar tir lama ITV kaltlanga video an tihchhuah pakhatah a fapa te 2 Sean Preston kum 16 mi leh Jayden James kum 15 mite chuan thla 1 chuang lai mai chu an nu Britney an hmu duh tawh lo tih a sawi a, an mahni duhthlanna leh thutlukna ngei hmangin a nupui hlui Britney pasal neihnaah pawh tel loh an thlang tih a sawichhuak a ni.
Kevin hian a fapa ten Britney Spears hmuh an duhlohna chhan, chhan tam tak a sawi zingah, Britney in a saruak thlalak social media lamah a pholan chu a faten hmuin he thil hian a fate rilru a tihnual niin a sawi lang bawk.
Saruak thlalak pholan chungchang a sawi chu, Britney pasal Sam chuan chhang let ve nghalin, Britney hian a saruak ngal ngat thlalak a pholang lo niin a sawi a, a mawngbawr bak pholan a nei lo niin a tarlang ve bawk a ni.
Hei bakah hian, Sam chuan Kevin chu kap zuiin, naupangte chungchanga a thusawi chu thu awmze neilo a ni tih sawiin, tunah Britney fate chuan rawlthar nun an hmang chho dawn a, an mahniin thutlukna fel tak an kalpui thei tep tawh a ni a ti. Britney fate chu kum 15 an tling dawn tawha hemi hun chhung zawng hian Kevin chuan a fate tan entawn tur hnuhma hnutchhiat a la nei lo a ti bawk.
Nu ber Britney pawhin rawn tuihnih ve lehin, Kevin’an a fate nen an inkar thu a sawichhuak ngam chu lungchhiatthlak a tih thu leh, rawlthar te enkawl seilen hautak zia chu tute pawhin a hria a ti a ni.
Britney chuan Kevin interview tawngkam hi a la na hle a, nu a nih angin a fate chu engkim a pe a ni a ti bawk.
