Brazil hmarchhak lam, Minas Gerais state-ah yellow fever a len avangin sorkarin emergency a puang.
Nikum December thla aṭang khan yellow fever leng vang hian mi 15 an thi tawh a, hri leng hian state khawpui Belo Horizon-te pawh a thleng a ni. Chhim lam state pathumah vaccination programme kalpui mek a ni.
Argentina ramah pawh carnival hmang tura Brazil rama zin tum an tam vangin Buenos Aires leh khawpui dangahte vaccine lak runpui neih mek a ni bawk.
Minas Gerais-a hian nikum June thla thleng khan yellow fever vei hi mi 475 an awm tawh a ni. World Health Organisation chuan hri lenna biala zin tumte chu an zin hma ni 10-ah tal vaccine la phawt turin a ti.
Yellow fever hi khawsik pangngai nena ngaipawlh a nih fo avangin hriatchhuah pawh a har nia sawi a ni. Thosi aṭanga kai theih niin, khawsik, thahrui leh hnung na, lu na, tlun, thil ei chakna bo, luhai leh luakten a thawk ṭhin a ni. A nasa tawhah chuan khawsik sang tak, thisen chhuak, kal function lo thlengin a awm thei.