Your Daily News

An Fapa Damlo, Naupang Kum (1) Mi Chu Doctor In A Khawih Duh Loh Avangin A Boral

0 2,517

Premchand leh Asha Devi-te chu an fapa, naupang kum (1) mi khawsik sang vak avang leh a dinhmun a that loh em avangin Sawrkar damdawi in lamah rang takin an tlan tih hriat a ni.

Mahse, vanduaithlak takin an fapa damlo naupangtê chu Doctor in a khawih duh lo niin an sawia Kanpur damdawi in lian zawk leh changtlung zawk pan mai turin a hrilh ta hlawm a ni. Kanpur damdawi in hi tuna damdawi in pan mek Kannauj district, UP atang chuan 90km zet a thui a ni.

Doctor-te chuan puih a hnekin damdawi in dang pan thuai turin an hrilh nawn chhen tih an sawia sum an neih loh avang leh an fapa dinhmun chu a that loh em avangin Damdawi in kawt zawlah chuan an ding ta reng tih an sawi.

Hemite nupa thawm lo hria mithenkhatten damdawi in tuala an thu reng lai chu thla lo laksakin, Premchand leh a fapa naupangtê chu kawtlaiah chuan an lo let renga an bul hnai maiah a nupui Asha Devi pawh a lo tap mek bawk a ni.

Premchand in NDTV a hrilh danin mi thenkhatten thla an rawn laksak hnuah Doctor-te chuan mualphoh hlauin an fapa chu an exam sak tih a sawia hemi hma zawng hian tumahin an fapa chu khawih leh en pawh an tum hauh lo a ti a ni. Damdawi in dang pan tur erawh chuan a hrilh zing malh malh hle tih a sawi bawk.

He naupang hi nimin tlailam Dar 4:15pm vel khan emergency ward-ah admit a ni ta chauha, admit a nih atanga hun rei vaklo minute 30 hnuah a boral zui ta a ni.

Rajesh Kumar Mishra, Kannauj district damdawi lama hotuber chuan he naupang hi theih tawp an chhuah nachungin an chhan hman ta lo tih reporter-te a hrilh.

A hma pawhin UP ah hian naupang damlote ngaihthah an nih avangin thi an awm nual tawh niin an sawi. Premchand leh a nupui Devi-te hi an lainatawm tak zet a ni. An fapa thihna avang hian an lung a awi thei lo tih an sawi.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com