An Chenna In Kang Hluah Hluah Karah An Tualzawlah Thuhriltu Chuan Live In Pathian Thu A Puang Chhuak!
Amaha rinna alh hluah hluah chu an chenna in hualtu meialh hluah hluah nen chuan khaikhin chi rual a nilo!
South Carolina, Piedmont, Grace Cathedral Ministries dintupa Sammy Smith chuan, an chenna in kang mek meikhu dum kuk hnuaiah Thawhtanni liam ta khan Facebook kaltlangin Pathian thu a puang chhuak tih tualchhung chanchinbu WYFF chuan a tarlang.
America rama thuhriltu hmingthang tak pakhat Sammy Smith te chenna in chhawng chung zawk chu vanduaithlak tak maiin Monday ni liam ta khan a kang hlauh mai a, Simpsonville Fire Department lam chuan thelhmih tumin theih tawpin hma an la tih hriat a ni. He in hi Sammy chuan kum 4 liam ta khan a sa zo a, rei pawh an luah hmain a kangchhe zo ta a ni.
In kang mek karah chuan Thuhriltu Sammy Smith chu Camera lam hawiin Live in Pathian hnenah a nunna a la zuah avanga lawmthu sawina a nei a, an mahni lo buaipuitu thenawm khawvengte leh Fire Department te hnenah lawmthu a sawi tel bawk.
“In chu nasa takin kang chhe mahse Pathianin kan nunna venghimin meialh karah min la chhuak a ni. Kan chunga Pathian thiltihte hi kan hrethiam lo thin zawk a ni” tiin nuisang chung leh hlim tak chungin thu a sawi a ni. Pathian awmpuina a zarah engkim a tha leh ang tiin lawmthu a sawi mawlh mawlh mai a ni.
Sammy chuan “Kan chenna in kang mek chu keimah Live a Pathian thu ka puanchhuah lai ang maiin mitin in hmu a ni lawm ni? Pathian thil tumte kan hriatchian theih nan Lalpa Pathian chuan kan chungah thil engemaw tak a thlentir a tul a ni” tiin mipui pungkhawm hmaah an in kang mek tualzawlah chuan Sermon ropui tak a thlak zui ta a ni.
