Your Daily News

An Chenna In Chhungah A Fapa Kum 28 Chhung Zet A Lo Khungbet

0 630

Sweden, Stockholm khawpuia cheng nu pakhat chuan ama fapa ngei chu an inchhungah kum 28 zet a lo khung bet tih hriat a ni. A fapa chu kum 12 a nih sikul ah pawh luhtir duh lova, room pakhatah a lo khung bet char char mai a ni. Police-ten an chenna in an dap lai hian a fapa chu kum 41 a tling tawh a, a nu chu kum 71 a upa a ni tawh bawk.

An thenawmnu pakhat chuan, “Hemite nufa hi an chenna in tukverh leh kawngka pawh an hawng ngai lova, boruak tha hipna chang pawh an hre lo” a ti a ni. Mipa khat pawhin a nu chu an be fo maia mi pawh a chhang tha duhlo tih sawiin, a fapa chanchin an zawh pawhin a chhang tha duh hlawm lo a ti a ni. A fapa chanchin engmah a sawi duh ngai lova, a fapa chu “A dam tha” tih bak sawi a nei ngai lo tih an sawi. An kawngkhar chu an khar phui tlat avangin an chanchin engmah an hre theilo tih an ti a ni.

A nu chu a damloh avangin damdawi in lamah dahluh a nia, a awm loh hlanin an chhung leh khatte an chenna in tifai tura an va kal tumin an inchhunga thil thleng rapthlak tak chu an hmu ta a ni.

A fapa a khungbehna room chu kum 1 chuang zet tihfai lohin a awm tawh a, a zun leh ek nen tawp thei ang berin a lo khawsa a, a rim a chhe em em bawk. A fapa chu chaw tha pek a nih loh avangin a kal tha thei lova, a chauh em avangin a tawngchhuak theilo tih an tarlang bawk.

A fapa chu an han en uluk leh deuha, a ha pawh a bal vek tih an sawia, rang takin damdawi in lamah an tlanpui ngal a, uluk takin enkawlna pek a ni tih an sawi. A nu pawh damdawi in atanga a chhuah hunah an inchhunga thil thleng leh a fapa a lo khungbehna chhan chu zawh chian a ni dawn tih thuneitute chuan an sawi.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!