Your Daily News

Accident A Tawh Avangin A Hriatna A Hloh Zo a, A Pasalin A Bem Nawn Leh Ngata An Innei Tha Leh!

0 2,508

Laura Hart Faganello leh Brayden-te chu Victoria, Canada-ah intawngin an inhmangaih hle. Thla 8 chuang an inzui hnuah 2016 khan an innei zui ta a ni. Chhungkua hlim taka hun an hman laiin Laura chu thir ban lian tak maiin a lu ah a deng hlauh maia, nikhawhrelo in a awma damdawi in lamah dah luh a ni.

A that chhuah leh hnu chuan engmah a hre tawh lova, Laura chuan kum 17 mi ang lek a nih thu leh a nunhluite engmah a hriat tawh loh thu a sawi. A pasal Brayden tak ngial pawh a hre tawh lova, a hmangaihna pawh a bo zo a ti a ni.

Lehkha ziak leh chhiar pawh a thiam tawh miah lova, a thar in a zir leh ngat a ni. Tha taka a tawng theih loh avangin a nu leh pa hnenah an thawn haw ta ringawta, engkim chu atan thil thar a ni tih doctor-ten sawiin a zir that leh a tul tih an sawi. Naupang chhia ang maiin engkim a bul atanga a zir leh a tul a ni. Laura chuan a hriatnate chu neih let leh dan a ngaituah chung pawhin engmah a hre thei hauh lo tih Facebook ah a tarlang.

Brayden chuan a nupui Laura chu a bem leh ngata nula leh tlangval, tunhma inhmu ngai lo ang maiin a tharin an inkawm leh ngat a ni. Brayden chuan Laura duhzawng leh a mizia engkim a hriat sa tawh avangin duat zetin a enkawla, hriatthiamna leh hmangaihna a enkawl zui zel avangin reilote ah a hmangaih ve nghal tih a sawi.

Tianga kum 2 chhung zet an inzui that leh hnuah August 2019 khan Brayden chuan innei turin Laura chu a sawma, Laura pawh chuan thinlung takin a lo “AW” ve bawk. Laura chuan “Ka hriatna ka hloh zo tawh nain Brayden ka hmangaihna chu ka nei let leh ta. Ka thiantha ber, ka crush leh ka hmangaihber val a ni. Hriatna thar leh nun thar nen nula nun chu ka tan leh a ni” tih a sawi.

An chanchin chu online lamah tarlan a nih hnuin mi 14,000 in an shared bakah mi 43,000 in an like zui bawk. Mi tam takin comment lamah an hmalam hunah tluang taka an kal zel theih nan duhsakna an hlan mawlh mawlh bawk. Thenkhatte chuan 2012 kuma film lar “The Vow” ang vel an ni tiin an sawi ve nghe nghe. Miten Brayden-a inpumpekna chu an fak mawlh mawlh bawk.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!