Your Daily News

A Selfie Laiin Tuikhawhthla 50ft-a Sangah Tlathlain A Thi

0 5,963

Soipov Abdullokh kum 22 mi Uzbekistan khualzin chu tuikhawhthlaah hlauhawm chhinchhiatna pela a selfie laiin a tlahlum tih hriat a ni. Inrinni tuk khan Southern Thailand, Ranong beauty spot ah Russian mi a thiante 6 nen kein an zinkuala, vanduaithlak takin a chesual palh ta a ni.

Soipov hi Pandemic avangin an ramah a haw thei bik lova Thailand ah hian a chambang ta renga, a thiante nen boruak nuam zawk hip tuma an zinna lamah tuikhawthla ah hian a tla palh ta hlauh mai a ni.

Tianga Soipov a chesual lai chu a thianten an lo hmuh thu an sawia, tuikhawhthla hmunah hian a selfie a, lung nal rap tleuin 50ft-a sangah a tlathla zui tih an sawi. Darkar 2 liam hnuah emergency service hnathawktute chu lo thleng ve nghalin Soipov hian a tlakthlakna hmun ah lung zum hriam tak a tauh palh tih an hmuchhuak ta a ni.

A luah lung zum hriam tak a tauhna hliam hmuh a nia, a thisen a chhuak nasa hle bawk. Paramedics lam chuan a tlakna hmunah hian a thi tih an puang zui ta nghala, a ruang chu Ranong Hospital lamah endikna nei turin thawn nghal a ni.

Police-te chuan Soipov tuikhawhthla atanga a tlakdan kimchang chu a thiante pawh an zawt chipchiar hle a, a zinpui, a thiante chuan tuikhawhthla bulthut sang takah thuin a selfie tih an sawia hetihlai hian a chesual palh ta tih an sawi. Ngao Waterfall National Park hi hmun mawi leh nuam tak niin zinmiten an tlawh nasa thin hle a ni.

Chalit Sinrojthanakorn, head government officer sawidanin Soipov chuan hlauhawm chhinchhiatna thuneituten an tar chu a hmulo niin a sawia a chesual zui ta tih a sawi. Helai hmun hi a nal em avangin khualzinte fimkhur turin an inchah ngun hle tih a tarlang bawk.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com
error: Content is protected !!