A Retheih Avangin A Bialnu In Then Mai A Duha, Sumin A Lei Theih Thil Chu A Hmuhtir Hnuah Ui Tak Chungin A Bialnuin A Chân Hlen Thung!
Nulaten nangmah mihring aiin mahin i sum chauh kha duhin ngaina zawk se, i thinlung chu a rum ve ngeiin a rinawm.
Netizen a hming David tia hriat chuan Dcard lamah a bialnu hmasa nen an inkara thil thleng chanchin sawichhuakin, hmangaihna aia rosum thlang zawktu a nihzia chu Twitter kaltlangin a tarlang tih an sawi.
David leh a bialnu te chu a tir lamah chuan an inhmangaih thiamin an induat thiam ve hle a, a bialnu chuan zawi zawiin hausakna lam thil a melh chho ve ta a, mipa dangten an bialnute thil man to tak tak an leisak thindante chu sawichhuakin, mipa dang nen a dinhmun chu a khaikhin ta fo mai a ni.
David hi chhungkaw neinung tak a tanga chawrchhuak a ni a, a khawsakdan leh a chezia chu mi naran ang maia a lantir thin avangin, mi tam zawk chuan tlangval rethei tak angin an ngaih phah fo reng a ni. An chhungkaw chanchin kimchang chu David hian a sawichhuak duh ngailo thung a, a inthup thiam em em mai ani.
Nikhat chu retheihna avang chuan an inhaubuai ta a, a bialnu chuan bansan zai a rel ta mai a, David chuan a tawp nan zanriah kilpui turin a ngen zui ve ta a ni. A hma chuan David leh a bialnu chu kawngsira ei tur man tlawm te te zawrhna hmunah an chawl thin a, tunah erawh a tawpna tur a ni bawka David chuan Restaurant changkang takah luhpui a tiam ve ta a ni.
A bialnu chuan David sawmna chu a lo remtihpui a, kalchhuah zai an rel ta. Restaurant pan nan David chuan sum tam tham tak a paia a BMW Car chu la chhuakin, a bialnu nen chuan zanriah kil turin an chhuak dun ta a ni.
David chuan Restaurant aia ropui zawk mansion lam chu a panpuia, a hmun an thlen chuan chhiahhlawhten chibai an lo buka, chaw tuihnai tak chu an kildun ta a, a chhungte hnenah David chuan “Hei hi ka bialnu ka thiantha ber a ni” tiin a hmelhriattir vel a, a bialnu chu a hlimin David then a duhna thinlung chu a bo ta thuak mai a ni. A mitmengah chuan inthen tura thutlukna a siam ta chu tifuh lo a inti hle tih David chuan chiang takin a hmu thei a.
Chaw tuihnai tak an kil zawh chuan David chuan a car in hmeichhia chu an in thleng a va thlah phei a, hmeichhia car atanga a chhuk pah chuan David chuan, “Pawi ka ti hle mai, i hringnun duhthusamte chu ka puitlinsak thei silo che a” tiin…
David chuan hausakna hi hmangaihna kawngah thil pawimawh pakhat ni mahsela, hmangaihna chu sum leh pai ah chauh kan nghat a nih chuan, hmangaihna tlo leh kumhlun a ni ngailo tih chu a rawn tarlang chiang hle a ni.
