Brooklyn nu Bianca Turetsky kum 43 a upa chuan a pasal nen chenna in pakhata khawsa lova an awm hrang ta chu an nupa hlimna thuruk a ni tih a sawi.
Bianca Turetsky leh a pasal Dr. Peter Bach kum 58 a upate hi 2021, September thla liam ta khan an innei a, an inneih niah hmunkhata an khawsak loh tur thu an sawilang ta chu inneih chhimtute pawh an mang a ang hial a ni an ti.
Author Turetsky hian pasal nei tawh mahse a pasal bula khawsak aiin kum 10 lai a lo enkawl tawh a chenna in a zawhte chhanchhuah nen chauha khawsak a thlang ta zawka, hetiang bawk hian a pasal Bach pawhin a fapa rawlthar nen an chenna inah khawsak zai a rel ve bawk.
Mahse, hetih lai hian Bach fapa chu College kalin in a chhuahsana, heti chung hian Bach leh Turetsky te chuan awm hran law law an tum hlen ta zawk a ni. An 2 a hmunkhata khawsa lova an awm hrang ta chu an inhmuhni chu an tan thil thar zel a ni thung a, in date hlim ang maiin hun hlimawm tak an hman theih phah tih nuber chuan a sawi.
Turetsky sawidanin, miten a pasal nen an khawsakdan leh an awmdan chu sawi nuam tiin a chhe zawngin an chanchin sawi thin mah se a tam zawk chuan an thik vang niin a sawia, an nupa inkarah an awmhranna hian engmah harsatna leh buaina a thlen lo tih a tarlang bawk a ni.
