Your Daily News

A Damkhawchhuak Zo Dawn Lo Tih A Hriatin Mipa Naupang Kum 4 Miin A Nu Hnenah “Vanramah Ka Lo Nghak Ang Che, I Lo Kal Ang Tiraw?” Tiin…

0 1,463

Naupangte hi an rilru a thianghlimin an duhawm em em a, an khawsak dan leh tawngkam chhuakte chu vantirhkohte nen inzawmna nei ang hialin an sawi thin. A chang chuan puitling zawkte hian an mahniah zirtur kan nei fo thin zawk a ni.

A thente erawh an duhawmna a chuaia rinloh takin mual an liam leh mai thin! Heng naupang duhawm takte zingah hian Nolan Scully kum 4 mi pawh a nu leh pate tan chuan an khawvel tihlimtu leh a tel lova an awm theih hauh loh mipa naupang duhawm a ni.

Vanduaithlak takin Nolan hian kum 3 a nih laiin cancer natna vang tak mai rhabdomyosarcoma a vei tih an hmuchhuaka, a khawvel zinkawng tarlanna atan a nu leh paten Facebook page an siam sak nghe nghe. Englai pawhin a taksa ah chuan damdawi lam hmanrua chu a keng renga, thiante bulah infiam leh zuan zawk zawkte a thinlungin duh teh mahsela thil theih a ni si lo!

Thlakhat chuang dawn chu cancer natna damdawi hmanga enkawl a nia, chemotherapy an tihsak hnu leh uluk taka enkawl a nih hnu chuan a hmelte pawh a lo danglam chhova, a nu leh pa Ruth leh Jonathan pawhin beisei eng hla taka de va va chu an hmu ve theia, an lawmin an fapa damkhawchhuah hun bakah engmah thlakhlelh an nei lo.

Chutia beiseina nen hmalam hun an thlir mek lai chuan an hlimna chuan rei a daih dawn ta hauh lo mai. Nolan Scully chuan he cancer hi a hneh dawn lo a ni tih tawngkam tlang tak mai chu Oncologist pakhat hnen atangin an dawng ta nawlh mai le. Amah ngei pawh chuan a dinhmun dik tak chu a hai biklo lova, a nu leh pate hnenah an fapa chanchin dik tak chu zep loin an hrilh tlang vek bawk.

Vawikhat chu Nolan’an na a tawrhna chu a nasat em avangin a nu hnenah “Nu na ka van ti em!” tiin a nu ban a vuana, a nu, Ruth thinlung chu eng ang takin na ang maw! “Bawihte, he hmunah hian zawng ka chhanhim thei tawh lo che a ni. I himna hmun awm chhun chu vanramah chauh khian a ni” tiin a fapa ban chu nghet takin a vuana mittui nen an inpawm vawng vawng mai a ni.

Nolan chuan sawi sapin a nu Ruth ban vuanin, “Nu a nih vanram chuan ka han kal anga, i lo kal hma loh zawng ka infiam anga, ka lo nghak reng dawn che nia,” tih sawichhuakin.. “I lo kal ngei ang tiraw?” tiin a zawt let a, he thu a sawi lai hian pangai tak leh hlauhthawnna pawh nei hauh loin a nu mit en chungin thu a sawi thei a ni.

A nu chuan a kut dinglamin a biang a chul heuh heuha, a damchhunga a theihnghilh tawh ngai loh tur leh khawvela tawngkam mawi ber leh duhawm ber chu chhakchhuakin “Nu ka hmangaih che” tiin a khawvel hringnun hreawm tak chu a kalsan ta a ni.

Ruth leh Jonathan-te chuan an fapa Nolan Scully tawrhna nasat zia leh naupangtê ni sia a huaisen ziate chu mak an tiin a tawngkam chhuakte chu an thinlungah a cham reng tawh dawn a ni tih an sawi lang bawk. A thih hma ni hian hlim takin Nolan leh a nu Ruth chu an Damdawi inah an awmdun thu Women Working lam chuan an tarlang. A Lainatawm hle mai.

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!