America sorkar chuan Venezuela national parliament hotu Juan Guaido chu ram hruaitua thlawp tlat tur leh tuna an President Nicolas Maduro hi hnawl turin khaw thlang ram zawng zawngte chu a fuih a ni. Chutih a nih laiin a lehlamah chuan kan hriat tawh thin fo angin Rusia leh China chuan tuna ding lai President Nicolas Maduro hi an lo thlawp talt. UNO secretary – General chuan inremna zawng turin a fuih.
Tuna an lal Nicolas hi paihthla a, ram hruaitu ni tura amaha inchhal Juan Guaido chu British leh France ramte chuan an rawn thlawp leh ta. Tuna an President Nicolas duh lotu mipui tam takten an rilru an pho chhuah takah chuan British leh France ram chuan mipuite thiltih chu an thlawp ta a ni.
Nicolas duh lotute zingah hian America, Venezuela ram depa awm Columbia,Latin America ram tam zawkte an tel.OAS an tih America khawmualpui pahnih insuihkawm pawlte hian tuna Venezuela ramin democracy lamtluanga an kal dik theih nan kan thlawp vek tur a ni tiin US foreign Minister Mike chuan a fuih bawk.
US sorkarin Juan Gusido chu ram hruaitu ni tura an lo puan avangin President Nicolas chuan America Embassy a hnathawktute chu darkar 72 chhunga Venezuela ram chhuahsan turin thupek a chhuah ve ta a nih kha. Mahse President Nicolas hi ram lal a nih tawh loh avangin a thupek kan awina tur a awm lo, kan Embassya thawktute tumah an hawng dawn lo tiin Foreign minister Mike chuan a puang ve bawk.
‘Sawibuai tur leh inhnialna tur engmah a awm tawh lo, a chhan chu Nicolas hi ram lal a ni tawh lo, an ram a hruai thei lo, economic ah an tlahniam a,eiruk an ching a, democracy kalphung an zawh lo, ka sawinawn dawn, Nicolas hi president a ni tawh lo, chuvangin a thiltihte hian engmah awmzia a nei lo’ a ti. Chuti a nih chuan buaina hi lo sang zel se la, sipai chakna in hmang dawn em? tih an zawh leh chuan Trump chuan ‘chutiang chuan kan ti ang tih kan nei lo, mahse a tul tul kan ti mai dawn’ tiin a chhang.
Venezuela Capital Cityah chuan lal hlui duh leh lal thar duhte an in nuai tan tawh a, an defense minister chuan lal hlui a duh thu a puanga, hetianga chetna hi thuneihna inchhuh tum a ni tih a sawi. Lal hlui duhtute hi Rusia leh China chauh an ni lo, Bolivia, Cuba,Iran leh Syria ramte an rawn tel ve. He Venezuela ram chhung buainaah hian inrawlhloh tur UNO dan zui turin Rusia chuan US chu a hrilha, China pawn inrawlh lo turin a ngen. Turkey president chuan Maduro a thlawp thu a rawn sawi chhuak bawk. Mahse lal thar thlawptute hi an tam zawka, tunah hian ram 60 in an thlawp tawh a ni.
source ‘VOA’
