South Korea-a Miryang khuaa Sejong Hospital-ah nimin khan kangmei a chhuak a, mi 41 an thi a, midang eng emaw zatin hliam an tuar.
Sejong Hospital-a kangmei chhuak hi a inchhawng khatna, emergency room aṭanga chhuak ṭan niin a hriat a, he vanduaina thlen lai hian damdawi-in leh a bula tar ernkawlna, nursing home-ah hian mi 200 vel an awm a ni. An zinga 94 chu tar enkawlna hmunah awm a ni a, damlo tam zawk chu him taka chhanchhuah an ni hman thung.
Kangṭhelhtute chuan kangmei chhuak vanga thi te hi meikhu an hip luh nasat vanga thi niin an sawi a, kangmei chhuah chhan hi hriat chian ala ni lo tih an sawi bawk.
Fire chief Choi Mon-woo chuan an ram huna zing dar 7.30 velah kangmei hi a chhuak ṭan niin a sawi a, darkar thum hnuah an ṭhelh mit thei a ni.
Hospital-a vanduaina a thlen hnu hian South Korea President Moon Jae-in chuan emergency meeting a ko nghal a ni.
Miryang khua hi South Korea khawpui, Seoul chhim chhak lam, km 270 vela hla awm a ni. Sejong Hospital hi kum 2008 aṭanga siam ṭan niin, lung lam enkawlna an thiam bik a ni. Hospital-ah hian staff 35 an awm.