Your Daily News

Mobile App ah chhiar theih in a awm e

Team intiat tawk: Arsenal vs Liverpool

0 123

Zanin dar 1:15-ah Premier League inkhel hmuhnawm a awm dawn a, Arsenal chuan Liverpool an mikhual dawn. Match 18 khelh tawhah club pahnih inthlauhna chu point khat chiah a ni a, an intiat tawk hle.

Champions League khelh tum club pahnih tan chak loh a thiang lo a, ‘club lian’ nia inchhal club-in a tlawm zawk nih an duh lo ve ve ang – a tawi zawnga sawi chuan zanin inkhel a hmuhnawm dawn a, hmaih phal chi a ni lo.

Kirna hmasa

Nipui transfer lai khan Chelsea hel karah Arsenal-in an player pawimawh Alex Oxlade-Chamberlain chu contract thar an zawrh a, mah se kum 24 mi midfielder hian sum tam zawk hnarin a ngaihsan Steven Gerrard-a khelh ṭhinna Liverpool pan a thlang a, hlawh tlem zawk hlawha Merseyside club tana khelh a thlang zawk hian Gunners ṭantute rilru a ti na – zaninah a vawi khat nan Emirates Stadium-ah a kir dawn.

Liverpool boss Jurgen Klopp chuan a player chu Arsenal hmachhawn tura a inpeih thu sawiin, “Alex hian a ni khatna aṭang khan a ti ṭha nghal em em a ni. He hmun a rawn pan hnua hma a sawnna leh amaha theihna sang tak awm chu goal khung theihna a ni. Arsenal-ah khan he dinhmun hi pek a ni lo a, Liverpool-ah chuan mawhphurhna lian zawk kan pek avangin a la ṭha dawn chauh,” a ti.

Klopp-a thlirna

Liverpool boss Klopp chuan Arsenal chu team ṭha tak an nih thu sawiin, “Engpawh thlen tir thei tur khawpa team ṭha an ni. An striker Oliver Giroud a inhliam mek a, mah se hei vang hian an buai lo ang. Player ṭha tak tak an kawl nual a, an goal khung tur dan tumin theihtawp kan chhuah a ṭul dawn a ni. Emirates Stadium-ah hian kan theihna sang bera khel chhuak turin kan kal dawn,” a ti.

Klopp chuan tlarhnung ven a ṭul thu sawi zawmin, “Goal khung tuma nawr reng ṭhin kan ni a, chumi avang chuan tlarhnung kan ngaihthah tur tihna erawh a ni kher lo – hmasawnna tur kan la ngah hle,” a ti – Reds hian October 22 hnua match 12 an khelh tawhah tlawm hmel an la hmu lo a, match sarihah hian goal an chhuah lo.

Reds dinhmun

Liverpool defender Joel Matip-a’n hliam vanga league match hnuhnung pali a khelh loh hnuah club training a zawm leh tawh a, Klopp chuan, “Arsenal hmachhawn turin a inpeih hman ang em ka hre lo a, hma erawh a sawn ve zel a ni,” tiin a defender chungchang a sawi a, a inlan a beiseiawm loh zawk.

Reds tlarhmaah dam lohna avangin Daniel Sturridge a inlan theih a rinawm loh a, Alberto Moreno-a’n dam chiang turin hun rei zawk a la duh tur thu Klopp chuan a sawi bawk. Reds tana chanchin lawmawm erawh Bournemouth laka hremna a hman zawh hnuah Emre Can chu chhawr theih a ni leh tawh dawn a, German midfielder telin Reds hi team ṭha zawk an ni.

Giroud a inhliam

Arsenal-in League Cup-a West Ham an hneh ṭumin hliam vangin Oliver Giroud lakchhuah a ngai a, Gunners boss Wenger chuan, “A hliam hi a na hle a ni,” tiin a striker chungchang a sawi a, hetihlai hian Hammers laka inhliam ve tho Francis Coquelin-a’n ngai a awh leh tawh a, chhawr theih zingah Shkrodan Mustafi a awm tawh dawn bawk.

An league match hnuhnung bera goal li khungtu Reds boss Klopp chuan, “Arsenal lakah hian goal tam tak kan khung leh thei ang em ka hre lo. Mahse, hnehna chang turin kan kal dawn. A harsa ang tih ka hria a, mah se kan tum dawn a ni,” tiin goal tam tak nena chak an tum thu a sawi – tlarhmaa Mohamed Salah, Philippe Coutinho, Sadio Mane leh league match-a Arsenal vawi nga a hmachhawna goal ruka inrawlh thei (four goals, two assists) Roberto Firmino neitu Klopp-a thusawi hi Wenger tan a ngaihnawm lo ang.

 

 

credit,vanglaini

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com