Your Daily News

Mobile App ah chhiar theih in a awm e

Man City an champion dawn?

0 121
Man City an champion dawn?

Premier League-ah Manchester City an kal fawr chhunzawm zel. Pep Guardiola hoten match 22 an khelh aṭangin hneh loh an la tawng lo, point 62 hmu tawhin anmahni hnaih bertu Manchester United aiin point 15-in an hmu sang zawk.

18-naah a tawp

City-in match 18 chhung league match an chak zawn hnuah Crystal Palace nen December 31 zan khan Selhurst Park-ah goal awm loin an inhnehtawk.

Palace hian injury time-ah penalty an hmu a, Luka Milivojevic pet chu City keeper Ederson-a’n a dang. Pep-a hote chak tluang lai record tawp mah se tun season-ah erawh hneh loh an la tawng lo.

Arsenal-in kum 2003-04 season-ah hneh loh nei loin season an hmang tluan a, ‘Invincibles’ hminglem pek an ni. Gunners hnung zui turin City an inpeih bakah theihna an nei a, an hmabak erawh a la thui hle.

City an tlo

Palace nena an inhnehtawk ṭumin City player pawimawh pahnih Gabriel Jesus leh Kevin de Bruyne te chu lakchhuah a ni. Hei vang hian City buaina a inṭanah a ngaih theih a, amaherawhchu Pep Guardiola hoten rinhlelh tur a awm lo tih khelmualah an pholang nghal.

Thawhlehni zan khan City-in Watford an mikhual a, Raheem Sterling-a’n second 38-na lekah goal a khung nghal. Minute 13-naah Watford defender Christian Kabasele chuan De Bruyne cross chu an lamah a tilut a, minute 15 chhungin goal hnih an khung tawh. Sergio Aguero-a’n minute 63-naah goal thumna a khung belh leh bawk. Watford-in Andre Gray hmangin minute 82-naah goal an khung a, hei erawh scoreline tilang mawitu chauh a ni.

Inkhelh banah Pep chuan, “Palace nena kan inhnehtawk kha match 19 chhunga point kan hloh hmasak ber a ni a, hemi chhanna hi minute 15 chhungin kan lantir nghal a ni,” tiin a sawi. League match 16 khelh tur la awm mah se City dal thei an awm a rinawm tawh loh.

Lawm a kim lo

Palace nena inhliam Gabriel Jesus chu khup hliam vangin thla khat aṭanga thla hnih vel bawr a chawlh a ṭul dawn a, Belgian midfielder De Bruyne erawhin Watford a hmachhawn thei thung. Watford nen an inkhelh ṭum hian defender Kyle Walker a inhliam belh a, Spanish manager Pep a lungawi lo.

City boss Guardiola chuan, “England-ah chuan inkhel hmuhnawm chhuah reng hi an duh dan a ni tih ka hria a, amaherawhchu mi pangngai tan chuan thil theih a ni lo. Thla 11 chhung a zawna an khelh avangin hetiang chuan player kan tichhe vek dawn. Inkhel ṭha zawk kan hmuh theih nan a khela te hi kan duat a ṭul a ni,” tiin player inhliam tam chhan chu fixture siam fuh tawk loh vang a nih thu a sawi.

Bayern Munich leh Barcelona manager hlui Pep chuan, “Football hi basketball leh tennis te ang a, ni hnih khata ngaiawh leh theih mai a ni lo. English football kal dan a nih avangin inkhelh kalphung an thlak mai ka ring lo a, amaherawhchu player-te hi kan ngaihtuah a ṭul. Anmahni vang chauha kal khawm ṭhin kan ni,” tiin krismas vuakveta inkhel tam lutuk chu thlak danglam thei se a tih thu a sawi.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP Facebook Auto Publish Powered By : XYZScripts.com