Night Club A Nu Pakhat Hurherhna Lam Hawia Khawihchhetua Puh Footballer Dani Alves Chu Jail-ah Khung A Ni
Brazilian international football player Dani Alves kum 39 a upa chu hurherhna lama hawia nu pakhat khawihchhiaa puh a nih hnuin, magistrate chuan jail-ah a thawn tih report chuan a tarlang.
Barcelona Night Club-ah December 30, 2022 khan bual in (Bathroom) chhungah Dani Alves chuan nu pakhat zahmawh rawngkaia khawihah puh a ni a, he an puhnaah hian thiam loh a chan tak avangin tân inah khung a ni a, bail theih loh tura hremna pek a ni ta a ni.
Zirhtawpni liam ta khan Catalan Police te chuan Barcelona player Dani Alves hi Mexico atanga Spain a lo kir leh hnuah an man a, investigators te chuan Barcelona police station, Les Corts ah a statement an la tih hriat a ni.
Mipathmeichhiatna lama hawia khawih tuartu hmeichhia in thuthar lakhawmtute a hrilhdanin, footballer Dani Alves hian a remtihna tel lovin Christmas chawlh hman lain hurherh rawng kaiin night club ah a khawihchhia tih a sawi a, thubuai a thehlut zui ta a ni.
Dani Alves hi season liam ta khan a khelhna club Barcelona chuan a contract an renew tawh loh avangin he Club hi a chhuahsan a, Pumas ah contract thar a ziak tih an sawi.
Kum upa lam ni tawh mahse, Dani hi a ram Brazil tan World Cup a khel leh thei a, World Cup tawp hnu khan Barcelona ah rei vak lo hun a khawhral a, hetih lai hian he buaina hi a tawk zui ta a ni. A chetdan mawilo tak hian sawi a hlawh hle a, football players dang te bakah milar thenkhatte pawh an tawng chhuak hial a ni.
