Wuhan Wet Market-ah COVID Hmuhchhuah A Nih Hmain France-ah Leh America-ahte COVID Hrik A Lo Awm Tawh: Chinese Scientists
Chinese scientist-te chuan COVID-19 natna hrik chu Wuhan Laboratory a an hmuhchhuah hmain France-ah leh America ramah a awm tawh tih an sawia, he COVID hi ralthuam hlauhawm siamchhuahna atana an duan a ni a tih theih tih an tarlang.
Chinese Centre for Diseases Control and Prevention, Chief Epidemiologist Zeng Guang in Global Times a hrilh danin, COVID lo chhuahna bul chhuichhuak turin US chu a bulpui pawimawhber a nih thu a sawilang bawk.
Ralthuam hlauhawm leh a kaihhnawih nei ramte chu natna lo irhchhuahdan zirchiang turin endik an tul thu sawiin, China sawrkar chauh chu a ram chhungah COVID irhchhuahdan chhuichiang turin World Health Organisations koh lut ram a ni a ti bawk.
Mahse, hetih lai hian China chuan full investigation tih a phal loh avangin a ni telin thuhkruk nei ang hialin khawvel ramdangte chuan an ngaih phaha, an ringhlel em em vek mai a ni.
US, National Institutes of Health in zirchianna (research program) atan samples a lakah US States 7 zinga 5, Illinois, Massachussetts, Missisipi, Pensylvania leh Winscosin-ah te chuan COVID-19 hi an lo kai reng tawha, Case hmasaber chu January 21, 2020 khan hmuhchhuah a nih thu Chinese scientist Zeng Guang chuan a sawi ani.
A sawizawm zel danin, Data atanga a landan chuan US ah hian December, 2019 daih tawh khan COVID natna hi a lo awm tawh ani a ti bawk.
Spokesperson of China’s Minisrtry of Foreign Affairs, Zhao Lijian sawidanin, US a an zirchianna chu international scientific journal a finfiahna an tarlante nen a thuhmun a ti ve bawk.
Zhao chuan, Virus natna hian lo chhuahna hmun hran hran a neia, Swedish epidemiologist sawidanin, COVID-19 chu Sweden-ah hian November, 2019 thlatir lam daih tawh khan a lo awm reng tawh niin a sawi ani.
Khawvel ramdangte chu WHO thawhpui tur in China sawrkar chuan a sawm a, WHO chu COVID origin zawnchhuah kawnga a pui tlat dawn a ti bawk.
Hei bakah hian, France rama European precision Medicine platform Chief Scientist Ju Liya pawhin France rama virus natna darh chu ramdang atanga lak luh niloin tual chhuak (indigenous) a nih thu a sawi a, Wuhan nen inlaichina a neilo a ti a ni. A sawi zelnaah, France rama COVID hrik leh Wuhan virus chu an pianphung leh ziarang (strain) pawh a danglam daih tih a tarlang ve bawk ani.
