Eng hunah nge zialzuk sim ila tha ber ang tia i ngaihtuah mek a nih chuan tun hi i tan zial zuk bansanna hun tha ber a ni mai thei.
China ramah pa pakhat Du tia koh kum 60 mi chuan zial a heh hle a, zial tel loin a khawsa thei hauh lo. Nitin zial a zu thina kum 30 a ral meuh chuan mak tak maiin Du vunrawng chu a eng (yellow) chhuak ta vek tih an sawi. He thil hi a damsam loh hnu damdawi in an thlenpui hnuah chauh an hrechhuak a ni.
Jiangsu Province, Huai’an Khawpui chhung Damdawi ina thawk doctor-te chuan Du hian a pancreas-ah bawk a nei tih an hmuchhuak a, hei hian jaundice natna hring chhuak lehin meizial a heh em vanga he bawk hi lo insiam a ni tih an tarlang bawk.
Theih tawp chhuaha an beih hnuah Doctor-ten Du taksa hmun 2 a tumour chu paihsakin, damrei a duh a nih chuan zialzuk bansan nghal turin thurawn an lo pe zui bawk. Heng harsatna a tawh mekte hi zu leh zial chatlak lova kum 30 chhung a khawih vang niin an tarlanga, mihringte nunna titawituber pakhat chu zial zuk hi a ni tih an sawilang bawk.
Vanneihthlak takin Du vunrawng chuan ngai a awh leh tawh tih amah enkawltu doctor-te chuan an sawi a, damdawi in atangin in lamah an hawtir leh tawh a ni. Du pawhin a khawsakdan hrisello tak chu bansan a tum thu doctor-te a hrilh ve bawk a ni.
