Your Daily News

Russian Opposition Leader Alexei Navalny Chu A Thingpuiah Tur Telhsak A Ni Tih German Doctor-ten An Sawi

0 267

Russian opposition leader Alexei Navalny, Putin dodaltu ber leh kremlim vocal critic an tih mai chu amah enkawltu German doctor-te chuan a thingpui ah tur telhsak anih thu an sawi chhuak ta. Alexei hi a nikhawhrelova thih ngama a nat avangin Siberia atangin Germany ah emergency in thlawhpui ania, tunah hian ICU ah ventilator nen hun a hmang mek a ni.

Doctor-te chuan Alexei hi tur chikhat Cholinesterase inhibitor groups zinga ami hmanga hrai anih thu Thawhtan ni khan thuchhuah siamin an tarlang. Eirukna leh hlemhletna duhlotu leh Putin kalphung diklo sawisel thintu Alexei hi Ningani liam ta khan Moscow – Tomsk thlawhnaa a chuan mek laiin a na thut maia heta tang hian nikhawhreloin a awm zui ta a ni.

Tunah hian Charite Hospital Berlin ah enkawl mek ania, a dimhmun pawh nimin lam thleng kha chuan a zia chho hret niin Doctor-te chuan an sawi. An hraina tur hian engchen nge mihring taksaah nghawng a neih dawn tih leh eng substance ber hmangin nge an hrai tih chu an chhui mek thu an tarlang bawk.

Putin’an kum 20 chhung rorelna a chan chhungin amah dotu leh a rilrem loh zawnga che thin, a hmelmate chu tur hmangin an lo hrai fo tawh tih an sawia, heng tur hmanga hraihlum zingah hian Russia ram mi challang tak Alexander Litvinenko pawh a tel tih an sawi. Alexander Litvinenko hi London Hotela a innghah tumin a thingpui inah polinium-210 telhsak niin a thi zui ta a ni.

Mithiamte sawidanin Alexei hraina atana an tur hman chu Kim Jong Un unaupa (half brother) an hraihlumna nen a in ang hle niin an sawi bawk.

German Chancellor Angela Merkel chuan he thil duhawm lo tak hi uluk tak leh ngawrh taka chhuichiang turin Putin hnenah ngen a thehlut tawh tih hriat a ni. Heng thilsual titute hi rorelna hmaah hruaichhuak ngei turin a ngen tih a sawi lang bawk.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com
error: Content is protected !!