South African rapper Costa Titch chu Stage-ah a perform mek laiin a zawna vawi 2 a tluk hnuah a thi tih hriat a ni.
A rap lai video sulhnu atanga a landanin, Costa hian Saturday zan khan mic humin stage-ah a rap a, he a perform-na hmun hi Johannesburg bul Ultra South Africa Concert neihna hmunah a nih thu report chuan a tarlang.
Costa hian vawikhat a tluk hnu hian a back up singers te a ban hman tawk a, an puihnain a hla chu a rap zo hram a, a hnuah tlu nawn lehin kâ pawh chhawn hman loin stage-ah a boral zui ta a ni.
Emergency responders te leh a team te chuan a nunna laklet leh tumin theih tawp an chhuah nghal a mahse, Costa nunna chu lak let theih a ni ta chuang lo a ni. A thih chhan tak pawh puanzar a la ni rih lo a ni.
Ultra South Africa rep pawhin, rapper Costa thihna chuan ram mipuite a thawng tak zet tih tarlangin, talented rapper, dancer, songwriter leh singer lar hi engtihah mah an theihnghilh tawh lovang tih a puang zui bawk. A chhungte pawhin Costa nunna chhan a nih theih nana theih tawp chhuahtute zawng zawng chungah lawmthu an sawi tak meuh meuh tih thuchhuah siamin an tarlang ve bawk.
Costa hi a hit song Big Flexa avanga khawvel hriata lar chho kha a ni a, he hla hian YouTube lamah 54 millions viewers a nei mek a ni.
