Thailand, northern province, Mae Hong Sorn a khawsa chhungkaw paberin a nupui chemtein a vithlum tih an sawi. Nupa tuakte hi thalva ekchar lo thleng tur atana lo inruahman lawk nan nitin mamawh tui hmandan chungchangah an inhnialbuai a, chhungkaw paber chu a thinrim zui ta a ni.
Pai District, Mae Hong Sorn hmuna inthahna thlen hun hi zing Dar 10:30am bawr niin an sawi a, Police officers ten he thilthleng hi an hriat veleh buaina thlenna hmun Moo Ban Santichon lam chu an pan nghal tih an sawi. Mahse, helai hmun an thlen hian tualthahtu paber chu ramhnuai pilrilah a tlanbo hman a ni.
Officers te chuan a pasal kut tuara boral ta Seo Wu kum 55 ruang chu kawngka bulah an hmu a, a taksa hmun tam takah chemte vihna hnuhma a awm tih an sawi. Ms. Seo Wu hi a thisen a chhuah nasat avangin a chau chhe hle a, a boral zui ta tih Police te chuan an nemnghet a ni.
Police-ten thenawm khawvengte hnen atanga thu an dawn danin, mahni nupui thattu hi Jingfei Saeliw kum kum 56 a upa a nih thu an sawi a, an nupa hian tui hmandan remchem chungchangah an inhnialbuai niin an sawi. Nuber Seo Wu chuan a pasal chu tui harsatna an tawk dawn nia a hriat avangin thlai tui pe tawh rih lo turin a hrilh a, a pasal chuan a duhloh avangin an buai zui ta a ni.
Thawklehkhatah paber chu thinrim thutin, nuber Seo Wu chu a vit ta thut mai a, a thi tih a hriat veleh ramhnuai lamah a tlanchhe zui tih an sawi.
