Heathfield, East Sussex a khawsa kum 67 mi David Fuller chuan 1987 kumah hmeichhe 2, Wendy Knell leh Caroline Pierce te a thah bakah mithi ruang 100 chuang teh meuh a pawngsual tih a puang!
Pawikhawihtu David Fuller hi nupui pawm lai niin, amah hi an chennq chhehvelah chuan pa zaidam leh mi tha tak mai a ni a, a hringnun thuruk erawh rinphak bakin a rapthlak a tih theih a ni.
David Fuller hi damdawi ina hnathawk te zingah pawh mi senior tak leh mi te zahkai tak mai a ni a, a hnathawh ber chu electric current hmanga mithi ruang dahthatna hmun ruang senghawi niin, ruang tawih turte chu a lo sawngbawl tha thin a ni. A hnaah hian rinawm hle mahsela, mi thenkhetten an chhungte ruang awmdan leh hnathawktu David Fuller khawsakdan chu rinhlelhna an neih chhoh tak avangin thil awmdan an chhuizui ta a ni.
Investigators te sawidanin, a pawikhawih dan leh hmeichhe 2 a that dan chu DNA hmanga an chhuizui hnuah David Fuller chu tualthah thubuai bakah mi ruang khuaikhem thubuaiah thiam loh an chantir ta a ni. He thutlukna hi Mrs Justice Cheema-Grubb chuan Jury te kaltlangin a puang zui ta a ni.
UK Home Secretary Priti Patel pawhin, an rama pawikhawihna rapthlak tak thleng chungchang chu sawilangin, David Fuller chetdan chuan mipui a ti mangang hle tih a sawi a ni.
