Nu pakhat chuan a nau hmeichhia bo mek chu a awmna chin hriat tuma theih tawpa a zawn buai mek laiin, hun reilote liam tachhunga a a nau thattu pa pakhat, kawngpui sira lo let reng misual chu tualthattu a ni tih hreloin a va tanpui a tih hriat a ni.
Chenai Radnedge chuan an chenna in atanga tlanchhuaka bo ta a nau Tammara Macrokanis kum 32 a upa chu a zawng chiam tih hriat a ni. Chenai leh a nau Tammara te hi tawngkama an inhnialbuai hnuah an inkarah buaina a chhuak zuia, Tammara chuan in chhuahsanin a tlanbo zui ta a ni. A nau bo zawng tur chuan Chenai chuan October 17 khan Gold Coast lam a pan ta nghal a ni.
Tammara hi damdawi ruihtheih bawi a tang tawh niin, an chenna in atanga a tlanbo hnu hian rilru na leh buaiin New South Wales lam pan a tum niin an sawi. A u chuan a nau zawnga a vahvaihna lamah kawngpui sira car lo ding piah maiah chuan pa pakhat chauh hmel tak lo let reng a va hmu ta a ni. He pa hi a chauh em avangin Chenai chuan a tanpui ta a, a hnuah a nau thattu a nih tih a hrechhuak ve ta chauh a ni.
Andrew Carter chuan ruichungin a motor chu chak zetin a khalh a, motor kawng zawh a lo kal mek Chenai nau Tammara kum 32 mi chu a suhlum zui ta a ni. Chenai in tualthattu a tanpui mek lai chuan Police car chak zetin a lo tlan a, Andrew Carter lak atanga awmsawn turin Police ten thu an pe zui ta a ni. Police te lo thlen hnu chuan a nau Tammara ruang chu motor kawngpui atanga 60m a hla kawngthlangah Police ten an lachhuak a, Andrew Carter chu a nau thattu ngei a lo ni tih a hrethiam ta a ni.
Southport Magistrate Court in a tarlan danin, Chenai nau Tammara kum 32 mi ruang chu hmun 2 ah a inthen phawk niin a tarlang a, Police ten tualthattu Andrew Carter chu manin thubuai an siamsak zui ta a ni.
