Your Daily News

China Ah Virus Thar Hmuhchhuah Leh A Ni

0 311

Scientist-te chuan China-ah khawvel pum tibuai thei tur khawpa buaipuiawm tur hri thar an hmuhchhuah thu an puang leh ta. He hri G4 EA H1N1 ti a a hming an vuah hi vawk aṭanga mihringin a kai theih niin scientist-te chuan an sawi a, a hri hi a kaina taksa mila insiamrem awlsam tak a nih avangin khawvel pum chawkbuai thei a nih thu an sawi a ni.

He hri zirchiangtuten Proceedings of the National Academy of Sciences journal a an tarlan dânah chuan he hri hi hri thar a nih avangin indanna a la awm lo a, chuvang chuan China ram chhunga hmun hrang hranga vawk an vulhna hmun leh a sa an sêrna hmunte chu uluk zâwka enkawl leh vil a ngai dawn a ni. Hri thar an hmuhchhuah hi kum 2009 a swine flu lêng nen khân a inang deuh a, mahse tun ṭuma mi erawh hi chu swine flu hmasa ai khân a danglam tawh a, tunah hlauhawm tak angin lang rih lo mahse khawvel pum buaina thlen thei a nih avangin uluk taka thlithlai reng a ngai niin a zirchiangtute zinga mi Prof. Kin-Chow Chang chuan a sawi.

A zirchiangtute chuan tunhnaiah China ram chhunga sa talhna leh vawk vulhna hmuna thawk zingah he hri kai hi hmuhchhuah an awm tih an sawi a, tuna swine flu indanna khawvelin a neih leh a hman mêk hian a vên theih loh avangin a danna tur hmuhchhuah tumin hma an la mêk tih an sawi bawk. Nottingham University a thawk Prof. Kin-Chow Chang chuan he hri chungchang hi sawiin, Tunah rih chuan khawvel pum coronavirus avangin kan buai a, natna dangah rilru kan pe hman rih lova. Mahse natna hlauhawm rawn darh theite erawh uluk taka kan zirchiana kan lo inrin a pawimawh hle a ni,” a ti.

University of Cambridge a Department of Veterinary Medicine a an hotupa Prof. James Wood pawhin mihringte leh rante kan khawsak ho avang leh nasa taka rante kan khawih avangin hri ṭha lo tak tak hi a darh awlsam hle a, chumi kawngah pawh chuan kan fimkhur hle a ngaih thu a sawi ve bawk. Tun ṭum chu hri thar lo chhuak tur ni a lang an hrechhuak hma in an puangchhuak hma bawk a, khawvel ram hrang hrangah buaina tam zawk a thlen tawh lo turah han beisei teh ang.

Leave A Reply

Your email address will not be published.

This site uses Akismet to reduce spam. Learn how your comment data is processed.

WP2Social Auto Publish Powered By : XYZScripts.com