Sumdawng Hausa Raj Kundra Leh A Nupui Lemchanthiam Shilpa Shetty-te Laka Sum Rs 1.52 Crore A Inbumna Thubuai FIR Thehluh A Ni!
Sumdawng Hausa Raj Kundra Leh A Nupui Lemchanthiam Shilpa Shetty-te Laka Sum Rs 1.52 Crore A Inbumna Thubuai FIR Thehluh A Ni!
Tunlai India ram leh khawvel nghawrnghing khawpa thawm nei lian nupa lar tak Raj Kundra leh a nupui lemchanthiam Shilpa Shetty te chuan, mipathmeichhiatna lam hawi hurhherh film siam thubuaiah harsatna an tawh mek laiin, an kawng zawh a bumboh chho dawn niin a lang ta! Tun hnaiah thubuai dang, inbumna thubuai avangin an nupa lakah FIR thehluh leh a ni.
Pune lam chhuak sumdawng milian Yash Barai chuan nupa tuak Raj Kundra leh a nupui Shilpa Shetty lakah thubuai a thehlut leh niin an sawi a, nupa tuakte hian Yash barai nena inremna an siam chu an bawhchhia niin an sawi.
Thubuai thehluttuin a sawidanin, fitness scheme ah sum invest tura thlem a nih thu leh a hlawkna tel tura tiam a nih thu a sawi. Mahse, a beisei ang chu Raj leh a nupui lak atang hian engmah a hmu let lo niin a sawi a, a sum a chhunlutte chu a dil let hnuah vaukhanna a tawk zui niin sumdawng Barai chuan a sawilang bawk. He thil hi July, 2014 kuma an lo kalpui tawh kha niin a sawi.
Complaint na angin, Badra Police te chuan Indian Penal code Sections 420 (inbumna) telin, 120-B (criminal conspiracy), 506 (criminal intimidation) leh 34 (common intention) te behchhanin FIR an ziak lut tih an sawi. Thubuai chhuina pawh chhunzawm mek a ni.
Raj Kundra hi a thubuai puitling film siam chungchang avangin Arthur road jail-ah thla 2 chuang khung a lo ni tawh a, a hnuah bail a chhuahtir a ni. He thil then hnu hian Raj leh a nupui Shilpa te chu pawnah an hmel hmuh tur a vang hle a, a hnuah Himachal Pradesh tlawha an zinna thlalak te chu a social media lamah a darh zui a nih kha!
