Shakira-in Actor Tom Cruise Hnenah Amah Nen Nulat Tlangvalna Lam Hawia Inchhaihfiam Bansan Turin Ngenna A Thlen
Miami F1 Grand Prix a intawng ta thut zaithiam Shakira leh actor Tom Cruise te chungchanga thu leng vel kha kan hre theuhin a rinawm. He hunah hian zaithiam Shakira chu Tom mit latuber nia sawi a ni a, amah nen inkawprem a hnialloh thu social media lamah pawh a leng chuai chuai a nih kha!
Milar 2 Colombian singer Shakira kum 46 mi leh actor Tom Cruise kum 60 a upate chu Grand Prix neih tuma thla an lakdunna social media lamah a darh nghal thuaia, mi tam takin an 2 hian inkawprem angin an sawi nasaa, milarte khawvel media lamah pawh an chanchin hian sawi a hlawh hle.
Tianga an 2 a inzui tur anga sawi awm chungchangah, singer Shakira chu a rawn tawng chhuak ve leh ta a, Shakira chuan actor Tom hnenah amah nen nulat tlangvalna lam hawia inchhaihfiam vel chu titawp tawh turin a ngen tih hriat a ni.
Spanish news outlet Marca in a ziahlan danin, mak tak maiin Tom mitah Shakira chu a parvul hle mai a, a inrinloh hlanin a zunah a lo uai der niin a tarlang bawk. Miami, F1 Grand Prix neih lai hian Tom Cruise chuan Shakira chu pangpar a hlan nghe nghe a!
Mahse, hetih lai hian Shakira lairilah erawh actor Tom chu a lang mang der lo thung a, tun dinhmunah Shakira chuan Tom nena an sawizawmna leh inkawp tur anga thu leng vak awma chu thudik lo a ni tih a sawichhuak ve leh ta bawk. Shakira chuan Tom nena hmangaihna kawng chhuk chho zawhdun turin engmah thinlung lamah thil awm a awm lo tih sawiin, amah nena inchhaihfiam vel chu bansan tawh turin Tom a ngen nghal a ni.
