Actor DiCaprio Leh Gigi Hadid-ten An Inkawp Tih Gigi Ex Zayn Malik-in A Hriat Hlauin A Ruk Thei Ang Berin An Lo Inkawp
Hollywood star Leonardo DiCaprio kum 48 a upa leh model chhelo tak Gigi Hadid kum 27 a upa te chu tunlai hian an inzui thawm social media lamah a ri ring hle a, an inkawp chanchin hriat chhuah a nih hma hian Gigi ex Zayn Malik hriat lohin a rukin an lo inkawp daih tawh tih hriat a ni. Zayn Malik in an inzui thawm a hrechhuak tur chu an duh lo hle niin report chuan a tarlang a ni.
November 11 a kum 48 tling ta actor DiCaprio leh model kum 27 mi te hi New York City Fashion Week ah thianthate nen party an buatsaihna hmunah an inkawp tih hriat a ni a, tun dinhmunah nupa ang maia an khawsak thu thudawnna chuan a tarlang a ni. Leo chuan Gigi koki-ah a ban a nghat a, midangte hmuhah an 2 hian thuruk an inhrilh sap sap tih hriat a ni bawk.
Thudawnna thenkhatin US Weekly an hrilhdanin, Gigi leh Leo te hian an inkar boruak chu hmanhmawh taka kalpui an tum lo tih tarlangin, an 2 a an awmdun dan leh mipui zinga an khawsakdan chu hriat hran a har hle niin an tarlang bawk. A thente chuan Leo hian a um zui zel vanga inkawp chho ta angin an sawi a, a mi thente erawh chuan Gigi hian a hmangaih thlawt ti an awm ve bawk.
Hmanni lawk khan actor Leo chuan a bialnu Camila Morrone kum 25 mi chu a then thut a, heta tang hian hmeichhe dang melh tawh loin a rilru leh thinlung chu model Gigi lamah a bunruak tih an sawi. Mahse, hetih lai hian Gigi leh Leo te chuan Gigi fanu Khai pa Zayn Malik mitmei chu an vengthawng hle niin an sawi a, ualau taka khawsak duh loin a rukin an lo inngaizawng reng tawh tih an sawi a ni.
Hei bakah hian Entertainment Tonight in a tarlandanin, Gigi leh Leo te hi an inhmu zing hle a mahse, Gigi chuan an inkar thu chu a ruk thei ang bera kalpui a duh avangin engmah a sawichhuak lo tih a ziak lang bawk. Gigi chuan a ex Malik chu a rilru hliam a tum lova a hmaizah avang leh Leo nen an inkar thu chu a hriatchhuah a duh loh avangin a rukin tiang hian ruahmanna a siam niin an sawi a ni.
