Brazilian football khelhthiam Neymar chuan Nilaini liam ta khan a bialnu raipuar a rinawmlohsan chungchangah ngaihdam a dila, a bialnu tan tawrhna nasa tak a thlen avanga a inchhîr thu tlang hriatah a tarlang.
Paris Saint Germain superstar chuan Instagram lamah post siamin, model leh fashion influencer a bialnu Bruna ngaihdam dilna hi ziakin a tarlanga, a rinawmlohna chungchang hi internet lamah a darh chiam hnuin tiang hian tlanghriatah ngaihdam a dil ta a ni.
A thu post ah hian Neymar Jr chuan a bialnu Bruna Biancardi chu a hmangaih tih sawiin, a hringnunah a mamawh tih a a sawi. Hei bakah hian Neymar chuan a dik lohzia sawiin, a bialnu nen an inlaichinnna chu chhawmnun zel a duh thu a sawia, Bruna tel lo chuan a nung zo lovang tih ziakin atarlang bawk.
Mak ve tak chu Neymar leh a bialnu Bruna Biancardi te hian an inkarah dan 3 an zama, pakhatnaah, Neymar’an hmeichhe dang a kawpin an hmuiah a fawp tur a nilo. Pahnihnaah, an 2 a an awmdun laiin hmeichhe dang a call tur a ni lo. Pathumnaah, hmeichhe dang a pawlin condom a hmang ngei tur a ni tihte hi a ni. He an dan zam avang hian Neymar hi a rinawmlo phah niin mi tam tak chuan ngaihdan an nei ve bawk a ni.
Bruna Biancardi leh footballer Neymar te hi 2021 atanga an inzui tana, kum liam ta khan an inngaizawn thu an puan hnuah kumin March thla liam ta khan Biancardi rai thu chu social media lamah a darh zui a nih kha.
