Your Daily News

Thinrimna

0 776
Dr. H.T.C. Lalrinchhana

Mi thinrim ang buan buan emaw, mi thinrim insual mek I hmu tawh anih chuan an mahni ah ngaihdan chintawk I nei thiam tawh thin mai anga, an mahni chu I hlau hle anih loh pawhin thiantha leh laina hnaivai atan chuan I duh hauhlo ang. Thinrim ching leh thinurna anih ang anga ti lang chhuak mai thin te chuan Lungin bang an zut anih loh pawhin, mi kawmserh an hlawh nge nge thin. Thinrim ve thin leh thinrimna ti langchhuak ve thin inih chuan I in hre lemlo anih pawhin chuti ang mi chu ini ve tihna ani ang.

Midangte chungah zilhhauna leh an thil chin thin thatloh zia pholan kan duh anih pawhin, thinrim bur bura tihlan aiin thinrimna tel hauhlo a zilhhauna emaw, an mahni lakah atul anga inthiarfihlim maia tin san dan zawn thiam hi mifing zia anih bakah vuaklet neilo nun ani ang.

Bible ah meuh pawh kan hmu a, Insual bur burna hmuna ruaipui kil ai chuan, inremtaka khawsakna hnuaia tam hnem lek tur pawh ei ho a hlut zia leh thlan zawk tur anih zia kan hmu.

Mizo pi leh pute chuan “Anchhia chu tuman an dawn duh loh avangin kawlkil thleng akal a, alo let leh nge nge a, anchhe lawhtu chungah atla thin” an lo ti thin. Thinrim angchhuak hian midangte anchhia kan lawh thin avangin chu kan anchhe lawh chu kan chungah a tlak leh nge nge thin avangin thinrimna lanchhuah tir hi mahni chunga meiling chhekkhawlna lek alo ni ang.

Mithiamte chuan mi â ti a sawitur ni chiah silo, mi rilru buai leh kalkim lo te hi ‘Mental disorder’ (Rilru lam buaina) an lo ti thin a, kan thinrim lai reng reng hian rilru buai leh kalkimlo -a kan awm tlat thin avangin kan thinrimna chu tihlan loh hram a finthlak ber ang. Mi rilru buaiten chhia leh tha hriatna fim an hloh a, pawi an khawih thin fo angin, thinrimna lanchhuah tir fo hi pawikhawihna awlsam tak ani ang.

Khawvel pum leh achhunga chengte hi thunun vek thei ni ila chu thinrimna tur hi kan neih a rinawm loh, chuti ahnehin dikna chanvo kan neih ang chiah hi midangte pawh hian an nei ve vek tih hi ramchhung dan in min khuahkhirhna ani miau si a, kan duhdan zela nunga, kan duhdan zela tawngkam hmang thin tura midangte kan beisei fona hi mawlna chi khat chu ani ber awm e.

Midangte duhdan leh lawmzawng kan hre vek senglo a, an duhdan leh lawmzawng ringawt tihsak hi an tan leh kan tan a that ber fo loh avangin, kan lawmzawng leh duhdan zawng ringawt ti thin tur leh sawi thin tura midangte kan beisei reng anih fo chuan midangte huatna leh thinrimna chu chawp leh chilhin alo kal ngei tur a ni.

Engchhan leh vang ber emaw a mahni inngaihhniam ringawt avang emaw in midangte hian min hmusit in emaw min ngainep tlata hriatna hi rilru lam natna (mental disease) ani a, hei hian chhan leh vang awmlo a thinrimna athlen tam thei hle, mi chezia leh tawngkam hman tawhphawt in ngaihbel a, ngaih huat tlatna a thlen thin.

Mi thenkhat leh chu midangten an hmuh leh pawm dan ngaihtuah thiam hauhlo a, mahni lo in dahsang ve ringawt mai, chumi avanga midangte chunga tawngkam chaltlai lo hman ngawt emaw, midangte lo hmuhsit ve ngawtna neih a awl hle. Chu chuan tullo a intih thinrim tawnna ahring sam hle.

Bible bawk hian mahni mita khanchhuk tiata bawlhhlawh awm hrechang silo a, midangte tlinlohna chhete ngaidam thei miah silo nih hlauhawm zia min hrilh. Kan anpui miten kan tawngkam hriam hman thin ang emaw, kan chezia duhawm lo ang an lo neih ve zeuh chuan alet tamtakin an chungah kan thinrim hluai thin a, an tlinlohna leh fellohna te chu enliam sak mailo in khing sawng tlat reng turin thutlukna siam a awl hle. Khawvel hian Indopui vawi hnih zet alo paltlang tawh a, tawp theilo a indona hi thleng thin nise, atu ate zawk zawk tan pawh dinchhuah emaw himdam taka damkhawchhuah theihna a awmlo ang. Nitin nunah Indopui tur kan siam tam poh leh kan tla chhe tulh tulh anga, kan nun a khawro tulh tulh dawn lek alo ni.

Kan dinhmun aia hniam ve leh chhawng daih te emaw, engtikah pawha kan thuhnuaia awm reng tur niawm takte chungah meuh pawh thinrim reh theilo put a awl hle. Kal ngaihna hre miahlo khawpa kan mihringpuite kan nghaisa zui anih chuan Van Pathian khi an lam arawn tan hun a awm ngei ngei ang. Mi an in hmuchhuak tawh emaw, an thiamlohna pawh an zahruk leh an pawm thlap tawh hnu a, diriam leh cheksawlh zui reng mai hi Siamtu pawisawina liantak ani anga, Engkimtitheia an lama a tan hunah phei chuan kan tliah hnawk hun a awm mathei lo ang.

Mihring hmel in ang chiah chiah pakhat mah kan hmuh ngailoh ang bawk hian, mihringte mizia leh rilru puthmang pawh hi a danglam theuh mai a, rilru thuhmun leh tum thuhmun theuh ni lemlo a min lo siamtu pawh hi a fing hle. Chuti anga kan rilru puthmang leh mize danglam theuhna in pawmsak lo leh in hrethiamlo zawnga rilru put leh in chaltauh zawnga kan kal anih chuan, mi a, Siamtu rorel dan hrethiam phalo kan ni ngei ang.

Mi thenkhat chuan an thinrim hrik thlakna atan an chiam emaw, midang te hrawk chiam te hi tul ni tlatin an hre thin. Chuti anga an an chiam leh an thinrim an che buan buan anih chuan a let thawkin midangte rilru na leh thinrim in an lo siam hman tawh thin. Thinrimna thunun dan (anger management) hi nitin zir thar ngai, thinrimna pholan hma a, a tireh tura rilru siamrem hman zir hi mifing zia ani ang. Chuti ang bawk chuan midangte hian an lakah thinrim hrikthlakna atan an chiam emaw hrawk chiam emaw ching ve dawn thung ta se, a ngaitheilo ber ber tur anni ve thung ang.

India ramchhung dan hman mek ah chuan thudik, finfiah theih anih phawt chuan mi chungchang mawilohna emaw pawh sawichhuah athiang deuh roh a, Mizo hnam dan kan neih ve ah erawh chuan, thudik reng pawh nise sawtpuina leh tangkaipuina tur awm miahlo a, mi chanchin sawi ngawt hi lei chawi theihna hial ni in “Kam tam man” an in chawi tir thin. Kan tan leh midangte tan pawha tangkaina nei hawtlo a thenawmte emaw midangte chanchin a kan rilrem loh zawng kan lo sawi ve vak vak fo hi chin loh tawp tur tihna ang ani ang.

Mi thenkhat leh chu midang ten dawt hmanga an fuihpawrh zeuh emaw, an lamtang niawm taka dawt ni chiah silo tawngkam awmze nei taka an sawi zeuh hmangin an thinrim ta hluai thin a, mi rilru buai (Mental disorder), mahni inthunun ngai mek annih in theihnghilhin hlingpui pai ang maiin an thinrimna chu an natpui a, an thinlunga khatliam chu an ka in an sawichhuak leh buan buan chawk. Kan thatna tur duh tak taka min hmangaihtu chuan kan thin tirim tur zawngin thurawn emaw fuihna emaw min pe ngai hauhlo ang, lamtang atan leh thinrim pui tura min duhtu te hian chuti ang thurawn thin ti khei zak tu chu min pe chawk. Chuti ang thurawn emaw fuihna min pe thin tute bawk chuan kan lakah midangte fuihpawrh leh thinrim tir an chingin an thiam duh. Midangte fuihpawrh theih leh fuihpawrh tura hmalak ngamna anga min hmu mawl ringawt pawh hi inthiar fihlim sanna tham zawk a ni.

Naupang awm ngai chinten ar ek pachal pawh an hmawm thawk thawk thin fo I hmu tawh thin anga, an mahni hnapkhir meuh pawh an kheuh mial mialin an hmawm leh thawk thin tih pawh I hmu thin ang. An hriatna leh an pawmdan ah pawina a awm tlatloh avangin an luak phah lemlo a, an pum lam anat phah lemlo bawk. Thinrimna kan neih hrim hrim hi kan rilru insiamrem dan azirin pai daih theihloh tur khawp tling a awmlo ang. Khawvel leh achhunga chengte hi kan pawmdan (perception) mai mai hian kan lo khawsa ho in kan lo nung ho mai mai thin alo ni.

Pasal in amah hringtu nu leh pa emaw, thisen zawmpuite a hmangaihna leh ngainatna atih dal theih miahlo ang bawkin nupuite pawhin an mahni hringtu nu leh pa emaw thisen zawmpuite an hmangaihna leh ngainatna an kalsan thei bik dawn lo a, mo chu mipa ina alo lawi thin avang ngawtin achhungte hran san ngawt tura khalh luih chi ani lo ang. Thil awm thei tur ni hawtlo a mi chunga beiseina tihsan ngawt avanga thinrimna piangchhuak reng thin lakah mahni rilru puthmang thlak hmasak hlawk angai tihna ani bawk ang. Midangte pawh hian keimahni ang bawk hian an nunah loh theih loh sual (Inevitable wrong) an nei ve theuh mai a, an tan insiam that ngawt theih anih bik loh avangin, an dinhmun kan hrethiam anih mai loh chuan an lakah kumkhua atan kan thinrim reng thei hial dawn alo ni.

Mi zurui te leh damdawi emaw rui, harhfim lote hian thinrimna ringawt an zawng emaw kan ti thin. Mitin in midangte lakah thinrimna in up kan nei theuh a, kan rilru harhfim loh hun hun ah tihlan talh kan tum thin tihna mai ani ang. Chumi awmzia chu thinrimna kan tihlan hun hunah kan rilru alo harhfim tawk tawhlo thin alo ni a, rilru harhfim lo pu reng lo tura thinrimna pai tawih kan zir thiam atul ang. Thinrimna zawng zawng hi pai tawih theih loh a awm arinawm loh, naupang hnap khir ei ching kan tarlan tak ang tho kha niin, kan rilru a kan pawmdan zawk thlak theih leh thlak ngam angai mai zawk alo ni.

Pa pakhat taima vaklo hian kaiten ah thingtuah tur a ek kurh kurh a, hreipui fawng chuan a khup a vaw chawrh maia, ana tuar thinrim thut chuan a hreipui chu hla takah a paih nghal thuai mai a, pem leh hliam thlen lo nafam chu arin aiin alo dam hma si a, harsa takin an kawmthlang hnimpui karah an hreipui paih chu a zu zawng leh ta vak ani awm e. Thinrim laia kan thutlukna siam leh kan thiltih reng reng te hi kan tan phur rit vek an lo ni zawk thin.

Mi thenkhat ve leh chu kan chanvo ni tlata kan hriat kan umna lamah te kan thinrim teuh thin, Eden huan atanga hnawhchhuah kan nih khan Bianga thlan tui luang zawih zawiha ei tur thawk chhuak tura thlah liam kan ni a, thlan tui luanga kan thawhchhuah te hi chu chuhbuai angai lemlo thin, chanvo tha leh nawmsakna kan um luattukna lamah midangte kan hmu sakhi vat thin a, midangte chungah sawtsawhlawt lem silo a thinrimna nasa tak kan neih phah thei.

Thinrimna leh thinrim tih lanchhuahna hian mi a huikhawm ngailo a, midangte a hnawt tiau zawk thin, fintu neilo tuiluang, khaw thal leh nipui huna kangchat leh mai thin nunah kan nun alo chang leh mai thin. Thinrim hma thin leh thinrimna tihlan tum tlat mite hian chhut chiang chiah ila, midangten min mamawhna aiin midangte kan mamawhna hi alo sang zawk fe thin a, midangte zara lo mawi leh lo nung ve tawk tawk kan ni chawk.

Mi thenkhatten min zah tawklo emaw, min palzam deuh emaw, min ngaisang lemlo ni a kan hriat avangin an chungah kan thinrim chawk, mite zah phur tur te, mite ngaihsan ni tur hian a man pek vek hi alo ngai a, kan nundan, tawngkam hman thin dan, midangte chunga kan rilru puthmang te adik angai a, mite min zahna tur hi hlawhchhuah (earned) ngai ani miau a, hmeltha min ti lem lo tute huat ve ngawt ang deuh mai alo ni.

Tunhma naupangte chuan sephung kan laichhuak a, lei leh lungno te chek khuarin kan insik tir thin a, hmuhnawm kan tihzawng tak a ni. Naupang thenkhat phei chu sakawr inkhalhtawna insual tir ching an awm. Mi tute emaw nena kan inchalhtauh emaw, kan in sual lai emaw, kan in haw hlur lai hi mi thenkhatte tan chuan hmuhnawm satliah mai ani a, kan hmelma te emaw, min haw ru thin tute phei chuan nui ru ver ver chungin min lo thlir thin. Midangte nena kan inhuat tawn pawiti lemlo tu hi an lo tam thei hle. Mifing leh mahni hma sial thiam chuan midangte huat lemloh leh midangte chunga phuba lak lemloh hi an nunkawngah an thlang thin.

Inhlawhfakna atana Taxi neitu pakhat chuan, an taxi khalhtu hnenah chuan “Miin an tauh palh che emaw, I pawi an sawi emaw anih chuan thinrimin kuthlak mai hauh suh ang che, cheng sang hu hi vawikhat hnekah I hnek ral mai a awl khawp ania” atih thin thu asawi. Midangten kan pawi an lo sawi palh emaw tawh palh chang alo awm anih pawhin thinrima tawng let ve nghal mai mi kannih chuan a bet zawkah leh hnehna changlo zawkah kan tan khut a rinawm, ramchhung dan leh hrai te anga rilru fim taka hmalak mai fo emaw hi thu hnu dawn mi te tihdan phung ani ang.

Hnathawhna atana darkar hmang tam apiang an rilru a hlimin, beiseina nungin a hmuak thin. Midangte tlin lohna leh kan chunga an that tawklohna te ngaihtuah rauh rauhna hun ngah apiang mi thatchhia an ni bawk ang. Mi thenkhat chuan in ngaihtuah lungpuamna hun thawl kan ngah luatah thil ni thei uk lo pawh kan suangtuahna hmangin kan ngaihtuah chawp a, thinrimna tur leh midangte huatna tur a hringchhuak leh nge nge thin.

Rawngbawltu pakhat chuan an nupa kar thu heti hian a sawi “Khum betin ka damlo a, ka nupui hi nitin pisa kai ani bawk. Tlai khat eirawngbawl hun awm velah ka nu in damdawi min rawn tulh atum a, ka nupui in min pek ka thlakhlelh em avangin patlinga pumpa in dawt sawiin ka ei ala hunlo e, ka lo ti a. Ka nupui lo haw in damdawi te min pe a min bawihsawm leh hun tur nghakhlel takin beng ka chhi ru reng a, dar ka han en a, pisa ban alo hun ta a, inchhunga thawm ri apiang ka nupui anih tawh ringin ka ring ka fan thin. Ka nupui reng alo haw thei lo. Zanriah ei alo hun a, khua alo thim lehzel a, ka nupui reng alo la haw lo, tunlai angin inbiakpawh zung zungna hmanrua kan la nei silo. Leng len hun awm velah pawh ka nupui reng alo la haw lo. Suangtuahna diklo pui pui ka nei zui a, ka nupui chu a thawhpui kei aia thlannahawm tak takte nen chuan nuam tawla teikual tur ah ka ngaihtuah lo thei lo. Ka thinrim lutuk chuan thutlukna ka siam nghet ta bur a, ka nupui chu alo haw rual rualin ka ma ngei ang tiin. Zan tlai tawh takah ka nupui chu arawn pen lut ta chhak chhak mai a, hmanhmawh takin ka mut pindan arawn hawng a, engmah asawi hman hma in, ka thinrim em avangin chhuak rawh ka ma che, ka ti ta tawng mai a, insawifiah ngial atum pawhin ka ngaithla duh ta chuang lo. Ahnu deuha ka hriat leh dan chuan, an pisa ah ka natna ngeih tur zawng damdawi a awm thu an sawi chu hria in, ke ngatin Aizawl veng mawng tak pakhatah ka damdawi tur zawngin alo kal hrep a, taxi man em pawh nei tawh silo chu, ke hlirin kan in a rawn pan let leh chu lo niin……” ti in a inchhir zia thu asawi uar thiam hle. Nupa kar thu emaw, thenawm te nen kan inkar thu ani emaw, thian leh rual leh midangte nena kan inkar thu ah phei chuan, rilru puthmang inhriat sak tawn loh (communication gap) avanga boruak thalo inmung, achhe zawnga kal vung pui zel avanga inhuatna leh thinrimna hi athleng tam thei awm teh e.

Mihring apiang ve in midangte ang phazo kan nih chuan kan nitin nunah rilrem loh zawng mihring kan tawng fo anga, kan thin tirim tu tawngkam leh chezia kan hmu nitin ang. Chu chu mi pangngai zia a ni. Mi dinhmun sang leh mi ropui deuh te phei chuan chuti ang chu an la tawng tam zaw mah thin. Mihringa kan lo pianga mi ang pangngai kan nih chuan rilrem loh zawng leh thinrimna tur kan hmu zut zut reng tur kan ti a ni. Mahse, ngaihtuahna fim hmang hman, midangte dinhmun leh harsatna chhutpui thiam mi chuan a thinrimna chu a thunun hman ngei thin, chuti ang mite chuan midangte malsawmna leh nun hmuingilna an dawng leh nge nge thin. An mahni lamah hlawkna an dawng zawk thin kan ti a ni.

This content is created from http://mizothuziak.blogspot.com/2017/10/thinrimna.html with Octolooks Scrapes

Leave A Reply

Your email address will not be published.

This site uses Akismet to reduce spam. Learn how your comment data is processed.

error: Content is protected !!