Thim leh Eng

Famkim lohna khawvel,famkim theilo he khawvel ah hian keini Menashe hnam te pawh chenna tlak a mite ngaih loh afur a thal a mutmu pawh tuah theih lohna,ram chhengchhia ah tu dang ngai lovin lenlai kan lo chen ve a.Mahse eng kan ti emawni kan ram pela han vah chhuah chang leh hna thawh honaah te hian hnamdang vai leh Israeli te hian min thinhrik in han in belh chian deuh hlek dawn pawh hian min phung hmuh deuh hru a in hriatna hi ka nei thin a,engnge a chhan,engvangnge?!!

Kan pianphung vang nge ni ang a,kan ei leh in vang,nge ni sakhuana vang zawk?!!tiin bengsikin ka ngaihtuahna ka sawm khawm ta a.Khawnge in thlir kual dan dan ang aw!! Rual khuma lallai partlan dan a awm tak hlauh in:-

1) Pianphung: Kan pianphung hi pian sual em ni silo taksa sei ut, mawng fual duai,ke phah hlaipui leh mit tung kaih thut leh palian pui ni awm tak,han din a chen awrh,Tarzan khua apiang a seilian hlir ni awm tak,kal kawnga han in pelh chang pawh a “Rimdang” nei,dawrkai sahbawn rimtui leh London,Paris lam Perfume pawh in a tih danglam zawh loh rimdang nei.Min lo phung hmuh sa deuh te phei chuan Hring ei emaw min ti zu nia!!!!!

2) Ei leh In: Ei leh in hi kan ko ham hle mai,ei duh loh a bar pawh kan neilo,kan hmuh a piang kan zawnghnah hmawm ti ila a sual tampui lo ang.Heng vawk, Sihal,zawng,ngau,ui,zawhte leh rul,ulawng chakai thleng a chawhmeh tui ber a lo nei thin in,sa uih, artui uih kan iai chuang lo,ei in avang a kum tam khum bet kan awm laiin,a then lah a enga ber nge a ngeih pawh hriat loh,hnathawk thei silo,in chhung kil khat a Chawke ang mai,chhungten hah em em in an chawm a, ‘I dam maw?’tih ngai reng reng lo a thu sen hlur lah bo lo.kan nau a hrisel lo,kan nu naupai a hrisel lo tiin Zawng sa leh Ngau sate kan eitir a,karei…karei min tlan bosan mai ang tih hlauhawm khawpin an harh a,naupiang hlim leh apian a fel loh deuh a,thla thum lai up a ngai ang ti a dawtvar sawi ngai hial tur….i hmu ve tawh reng em?!!Ka zinnaah ka hmu tawh a,cheheu!!In zawng/ngau khawi chu mihring ava ang ve?!!ka ti thelh ani,putar kha lo awm lo pheise chuan ka ti tak tak mai thei ani!!.

3)Sakhuana: Sakhuana hian serh leh sang a vawng zal em em a,Sunday kan serh thin a,vawikhat kan in khawm tawh chuan kan thil duh pawimawh tih a dal lemlo a,eiru thei mihlemhle deuh dawt sawi thiam an ding changa, Kohhranah thawhlawm an pek hnem theih phei chuan din hmun tha an ta vek.Officer lian leh eiru theite din channa hmun,rukruk,uire,thamna la thin ten mifel leh thate mitmei veng miah lova men pawh meng phal lovin Pilpit rawng danglam khawpa zutin duhthu min sam khum a,tlatlum velo ten pawlthar an din a,pawl lo pawl chu sawi loh lunglum hlau pawl thlengin zu din a mawle!!!

Khai le!!Bengsik kher pawh ngai lovin tuna kan nihna leh dinhmun atang hian a chunga kan sawi tak te khi han ngaihtuah let vang vang teh le….Miten min lo thinhrik a min lo phung hmuh pawh nise vui vaia lak chu a in thlahrun thlak fu lawng maw?!!!!!!!!

Chhiartu duhtak,kei pawhin ka bengsik kha ka thlah tawh a,ka hanZuanglam vela,inti engthawl fa hran hian lehkhabu dahna bulah ka ding a,Shiur ka ziahna exercise bu ka phawi chhuak a,a kawm ah chuan 7.8.94-tia ka ziah chu alo la chuang kiau mai a,he ka lehkhabu hi Rav Shimon Gangte,Menashe zinga Rav hmasa ber Shiur min pek thin ka ziahna ani a.Ka han ngaihtuah vang vang a Ni 7.8.94- chu mi engemaw zahin Ramtiam kan thlenni ani tih ka hrechhuak ta a.Kut tang leh ke tang chhiara kan belh khawm chuan reilo teah kum 13(Bar-Mitzvah)kan tling ve dawn ta……..E khai!! Group hmasa te ber te phei chu Bar-Mitzvah an lo tling daih tawh a lawm le…. Kan hnam tan kawl a eng ve tan ta, Lalpa chu fakin awm rawh se,Rav Avichail dam reng rawh se ti mawlh mawlh chungin ka lehkhabu chu ka pawm ta vawng vawng a.

“Tum leh duh anga thil alo thlenin lawm la,I tum leh duh ang a alo thlen loh pawhin lawm leh zual rawh-Kan tan a thatna tur ani fo zawk”