College-a kan canteen ah thingpui in turin ka kal a. Chutih lai chuan putar pahnih hi an lo lut a, ka piah lawk ah chuan an rawn ţhu ve a, pakhat zawk chuan a nupui chanchin chu a sawi thuak thuak a, a ţhianpa hnenah chuan a nupui chanchin a zawt ve leh a Chu putar chuan he ka thu rawn ziah tur hi a sawi ta ani. Ama sawi ang in ziah chhunzawm ang.Kum 21 vel ka nih lai kha ni tain ka hria ka ţhutna aţanga ral lehlam epah chuan hmeichhe pakhat tuna ka nupui lo ni ta hi a awm a chu chu ka hmuh hmasak ber na ani. Tumahin ani chu tunge anih min hrilh chawp ka ngai lo. Ka ngaihven nghal a, ka rilru in “saw nu saw ka nupui tur anih saw” tiin thu ka ti thlu nghal hmiah ani. A bak chu thil thleng nunhlui an ni tawh mai.
Ani nen chuan kan innei ta a, ka nupui chu mi chungchuang tak ani ka tan ngat phei chuan, nitin darkar 12 hna ka thawka, chumi hnua in ka hawng chuan, chawei-dawhkan ah eitur alo peih hman vek a, kan fate an mut hnu ah thil ţul tlem te kan ti zo va khum ah mu tur in kan inthawlh ve chauh ţhin. A lak aţang chuan thil chuangtlai leh tam tak ka phut lo, in haw lo takin kan inkuah hlun a ka bula a awm leh ka kuah thei chauh ringawt pawh chu ka tan chuan a hlu in a lungawithlak hliah hliah ringawt ani tawp mai. Ka ban a kham a kan inkuah dun rial a chu chu nuam ka ti tawk em em ani. ”Ka bula a awm chuan ka tan engto leh duhdang engmah ka nei lo” tiin ani pawh chu k hrilh mawlh mawlh zel, ka thinlung lalnu ani a ka nitin lalnu ani bawk, he thu hi nitin k hrilh ţhin bawk a ni.
Ka lalnu chuan nitin maiin mipa ka nih ang taka Puitling tak leh ‘pâ’ taka awm turin min fuih reng ţhin a, Pathian hnena kal tur leh ani hnena inhlan thar tur in min hrilh mawlh mawlh ţhin bawk, ka fate tan pawh pa ţha tak ni tur in min hrilh a, min zilh a, min fuih reng ţhin tu ani. Ka fate pawh I zawt thei ang, ka nupui kha nei lo ta ila, awm ta lo se tuna kan thlen chin hi kan thleng zo hauh lo ang. Amah avang chuan hetianga mi rilru khalh ngil thei riau tu hi an awm tih ka rin phah a, ani pawh chuan mi ţha zawk fate tana pa ţha zawk, inpe zawk leh mi fel zawk ni tura insiamrem turin min tiphur a, min kaihruai tlat ţhin. Ka hriatloh lai pawh in amah avang chuan mi ţha zawk nih chu ka tum reng zel.
Mahse nikhat chu a damsam lo ta tlat mai a, atir ah chuan ka ngai pawimawh tehchiam lo. Mitin te hi damlo thei vek kan ni a, thil danglam ani hran lo bawk nen. Mahse doctor te kan entir chuan ka nupui natna chu ngaihpawimawhawm tak mai ani tih min hrilha, anmahni ngei pawh chuan an ngaipawimawh hle ta mai si.
Chutiang tak chu ani ta ngei mai a, dam ţhat leh theih loh natna alo vei reng chu niin. Ti hian min zawt ţhin a, lo thi ta se, nupui dang ka nei leh angem tiin. Chuthil chu a mangan pui ţhin khawp in ka hria, hmeichhe dang ka nei tur chu a ngaingam lova, a vei em em reng ţhin. Kei chuan lalnu dang ka neih theih ka inrin tawh loh thu ka hrilh ţhin a, mahse min awihsak ngai lo. Kei chu hmeichhe mamawh chi hmeichhe kianga awm mamawh chi niin min hrilh fova, keimah chauh chuan ka hlim thei lo ti te in min hrilh hial ţhin. Mahse a mitmeng pawl ram mai nalh tak en chung in,”ka duatte, ka nunah hmeichhe dang tumah ka mamawh tawh lo, nangmah chauh hi ka mamawh chu ini asin, ka tan chuan nangmah chauh hi ka kianga hmeichhe awm tur ini asin,” tiin ka hrilh a, ka hnem fo ţhin.
Hun alo kal zel a, darkar 12 hna ka la thawk reng a, mahse, ka haw in dawhkan ah eitur alo in hung tawh ngai lo. Kan khum a ka nupui mu chu ka va pawm tho va, choka ah ka ţhuttir a, ka rawngbawl lai thlir chung in kan ti ti dun ta ţhin zawk ani. Engmah danglam awm lo ang maiin rilru inpawh takin kan titi reng thei tho ţhin. A chang chuan dawhkan ah chaw kil dunin, kan inhmu thei ringawt pawh chu kan lawm hliah hliah ţhin tih kan hmel ah leh kan ţawngkamin kan ti lang fo ţhin. A chang erawh chuan, chaw pawh amahin a ei thei lo va, ka barh ţhin, chung hun ah chuan a mittui a tla a, ngaihdam te min dil zawk hial ţhin, ”mahse chu chu a kianga ka awmchhan a ni” tiin ka hnem chang atam hle bawk.A damlo nasa hle ţhin ani.
A chau hle a, a chak lo chho telh telh a, amahin engmah ati hleithei lo chho ţana, a khat tawk in damdawi a ei reng a ngai ta bawk. Darkar 4 danah damdawi a ei ziah a ngai ţhin. Chaw kan ei zawh in khum ah ka pawm lut leh a, khumah ka mut a, a kiangah chuan ka inthawlh lut ve nghal mai zel, insi rialin ka ban kham in ala mu reng tho ţhin a chu ringawt pawh chu ka thlahlel em em ţhin. Mahse rei tak kan mudun hman ta lo, darkar 4 dan ah thawh ngei ngei a ngai a, damdawi ka pek a ngai ţhin, chuvang chuan thlamuang takin zankhuain kan mu dun tak tak thei tawh lo ani. Mahse, chung darkar 4 chhung a bula ka mut chu ka thlahlel em em a, nuam ka ti em em ţhin. Engthil mah in ka thlak thleng phal miah lo ang.
Chutia a thusawi lai chuan a han ngawi vang vanga, ka bul hnaih a ka college zirlai pui, chu putar thusawi hre phak tute pawh chu an hnuk a ulh tih an inhnit ri aţangin ka hre thei, kei ngei pawh chu ka bang bik lo. A sawi chhunzawm leh dan tur ngaihtuahin kan awm a, uluk takin kan ngaithla ru kar hlawm a, tichuan a sawi zawm leh ta a.Mahse kan taksa hian tawrh theih chin tawk hi alo nei ve a, kum 2 zet chutianga damlo na taka a awm hnu chuan a hun alo thleng ve ta. Thil lo thleng tur chu ka hmu lawk vek a, ka nupui pawh chuan a hmu lawk ve tho, chu thil chu alo thlen hun ah ani chu a lo let tawh dawn lo tih kan hrechiang ve ve hlein ka hria, chuti chung chuan chu thil lo thleng chuan hnunglam aţang min barakhaih thut tho mai. A hma ni in ka ban kham in a mu a tun ah erawh a awm ta si lo.
A tir ah chuan ka la na hle a, zawi muangin ka thi ve ni mai in ka in hria. Mahse, hun a han kal zela, tuar dan pawh ka thiam chho ţan ta deuh a, a chhan chu , tuna a dinhmun chu a hma ami aiin aţha zawk tih ka hre tlat a. Damdawi a ei a ngai tawh lo va, ka buaipui a ngaih vanga a inthlahrung lutuk a mittui tla ţhin te pawh a hul tawh ang, tuna buaipui ber tur chu a Pathian faka chawimawi leh dam taka zai leh lam chu ani tawh mai si tih chu ka pawm thlap a, a tan a ţha zawk tih chu ka ring a, ka pawm dam thei ta a ni.
Mahse, tuna ka buaina ber chu, a bungrua te hi an ni. Inchhung ah ka la dah vek a, a thawmhnaw te pawh Wardrobe-ah ka la dah thlap a, a mutna khum pawh khawih danglam lovin ka la daha, a lukham te pawh ka la dah thlap vek, ka paihbo thei hlawl lo ani. A thlalak te chu hmun tin ah ka hung kual ani tawp mai, ka kianga la awm ang maiin ka ngai a, chutianga ngaih chu ka duh tlat bawk.
Ka fate chuan a thawmhnaw te chu dahţha a, pindan te chu chei danglam turin min ti ţhin a, ka nunhlui zawng zawng thlen na hmun ani a, ka hun zawng zawng ka hmanpui na hmun ani si a, ka thei ngang lo ani. Tun thleng hian ka nupui nen chu in ah chuan kan la cheng dun ani tih chu keimah lam chuan ka ngaihdan ala ni fo ţhin.
Chutianga a sawi hnu chuan a ngawi leh rih vang vanga khatiang taka a nupui chungchang zahna leh ngaihsanna nena sawi kha ka la hre ngai lo, chu chu chulai hmuna awm ve te pawn an tih ve ngei pawh ka ring. A nupui kha a hmangaih in, a ngaisang takzet a ni tih a hriat mai, a damlaia a hmangaih chu tun ah pawh a la thi lova, a danglam mai ala rinawm loh hle bawk. Boruak reh tlawk tlawk chu chu putar rawn kalpui, a ţhian pa chuan a rawn ti tawp a, a ţhianpa hnen ah chuan,”a nihtak chu mawle, I tan a harsa ngawt ang, ka tih awmzia zawk chu, a damloh laia I buaipui nasat zia te, I hah zia te, i sawi kha I hah pui viau ţhin dawn anih chu maw le,” tiin a rawn ţawng chhuak a.
Chu veleh, chu putar chu a khi suk a, a hmel chu a danglam deuh hlek in ka hria, a lungawiin a hlim ani tih a hmelah chuan ka mitsir deuh rovin ka hmu thei a. Ti hian chu putar chuan a ţhianpa chu a chhang a,“Ni lo ve â, ţhianpa, khatianga ka lalnu tana rawng ka bawl thei kha nuam ka ti a, vannei ka inti hle zawk asin, hreawm tih chu a hnai lo, lawmawm ka ti a, a tana rawng ka bawl thei kha ka lawm hliah hliah a, ka lungawi lutuk ţhin zawk ani,’ tiin.